Suraj Chavan Arrested : मोठी बातमी! मारकुट्या सूरज चव्हाणला अटक, पोलिसांनी फास आवळण्याच्याआधीच शरणागती

Suraj Chavan News : छावा संघटनेचे पदाधिकारी विजयकुमार घाडगे यांना मारहाण करणाऱ्या सूरज चव्हाण यांना पोलिसांनी अटक केली आहे. सूरज यांच्या विरोधात लातूरमधील पोलिस ठाण्यात गुन्हा दाखल करण्यात आला होता. मात्र, त्यानंतर ते फरार होते. अखेर आज ते स्वतः पोलिस ठाण्यात हजर झाले त्यावेळी पोलिसांनी त्यांना अटक केली.

सूरज यांच्यासोबत घाडगे यांना मारहाण करणाऱ्या आणखी दहा जणांना अटक करण्यात आली आहे.सूरज चव्हाण यांच्या शोधासाठी पथके पाठवण्यात आली होती. मात्र, पोलिसांनी त्यांना पकडण्यापूर्वीच शरणागती पत्कारत ते थेट पोलिस ठाण्यात हजर झाले. दरम्यान, अटकेनंतर सूरज यांना जामीन मंजूर झाला आहे.

राष्ट्रवादी काँग्रेसचे प्रदेशाध्यक्ष सुनील तटकरे हे लातूरच्या दौऱ्यावर असताना विजयकुमार घाडगे यांना त्यांना माणिकराव कोकाटेंना मंत्रि‍पदावरून हटवावे यासाठी निवेदन दिले. कोकाटे हे विधीमंडळात रमी खेळत असल्याचा व्हिडिओ झाल्यानंतर छावा संघटनेनी ही भूमिका घेत तटकरेंना निवेदन दिले होते. तसेच विजयकुमार यांनी तटकरे यांच्यासमोर पत्ते देखील फेकले होते.

विजयकुमार हे निवेदन देऊन जात असताना राष्ट्रवादी काँग्रेसचे युवक प्रदेशाध्यक्ष सूरज चव्हाण यांनी आणि राष्ट्रवादीच्या कार्यकर्त्यांनी विजयकुमार यांना घेरावा घालत मारहाण केली. या मारहाणीत विजयकुमार हे गंभीर जखमी झाले होते. त्यांच्यावर खासगी रुग्णालयात उपचार देखील करण्यात आल्या. मात्र, या मारहाणीमुळे सूरज चव्हाण आणि अजित पवार यांच्या विरोधात छावा संघटनेचे कार्यकर्ते आक्रमक झाले होते.

सूरज चव्हाण यांचा राजीनामा

सूरज चव्हाण यांनी मारहाणीच्या दुसऱ्या दिवशी दिलगिरी व्यक्त केली होती. तर, चव्हाण यांच्यावर अजित पवारांनी कारवाई करावी म्हणून छावा संघटनेचे कार्यकर्ते आक्रमक झाले होते. अखेर अजित पवारांनी सूरज चव्हाण यांना राष्ट्रवादी काँग्रेस युवक प्रदेशाध्यक्षपदाचा राजीनामा देण्यास सांगितले.