Beed Politics Parli News : परळी नगरपालिकेत राष्ट्रवादी काँग्रेस, शिवसेना आणि अपक्षांनी स्थापन केलेल्या गटात एमआयएमच्या सहभागावरुन राजकीय गदारोळ उठताच संबंधीत नगरसेविकेने स्वत:हून या गटातून बाहेर पडण्याचा निर्णय घेतला आहे. आयेशा मोहसीन शेख यांनी याबाबत गटनेत्यांना हा निर्णय कळविला आहे. नुकतीच शिवसेनेने आक्रमक भूमिका घेत एकतर एमआयएमला हाकला, नाहीतर आम्हाला तरी बाहेर पडू द्या, असा पावित्रा घेतला होता.
परळी नगर पालिका निवडणुकीत महायुती म्हणून राष्ट्रवादी काँग्रेस, भाजप, शिवसेनेने एकत्र निवडणुक लढविली. त्यांनतर राष्ट्रवादी काँग्रेसने अपक्ष, शिवसेना तसेच एमआयएमच्या प्रभाग तीनच्या नगरसेविका आयेशा मोहसीन शेख यांना एकत्र करुन राष्ट्रवादी काँग्रेस, मित्रपक्ष गट स्थापन केला. वैजनाथ सोळंके यांची गटनेतेपदी निवड करण्यात आली. एमआयएमला सोबत घेण्यावरुन गदारोळ उडाला. शिवसेनेनेही आम्हाला विश्वासात घेतले नसल्याचा दावा करत एमआयएमला बाहेर काढावे, अथवा आम्हाला बाहेर पडण्याची परवानगी द्यावी, अशी भूमिका मांडली.
यानंतर आयेशा शेख यांनी स्वत:हून या आघाडीतून बाहेर पडण्याचा निर्णय घेत याबाबतचे पत्र गटनेते सोळंके व जिल्हाधिकाऱ्यांना दिले आहे. भाजप, शिवसेनेचा सहभाग असलेल्या या आघाडीत सहभागी झाल्यामुळे एमआयएमवरही चोहोबाजूंनी टीकेची झोड उठवली जात होती. त्यानंतर पक्षाचे प्रदेशाध्यक्ष इम्तियाज जलील यांनीही संबंधित नगरसेविकेला आघाडीतून बाहेर पडण्यासंदर्भात सूचना दिल्या होत्या. शिवसेनेचा विरोध आणि नेत्यांचे आदेश यामुळे अखेर एमआयएमच्या एकमेव नगरसेविकेने या आघाडीतून बाहेर पडण्याचा निर्णय घेतल्याचे बोलले जाते आहे.
परळी नगरपालिका निवडणुकीत शिवसेना, राष्ट्रवादी काँग्रेस आणि भाजपच्या महायुतीने स्पष्ट बहुमत मिळवून सत्ता स्थापन केली. मात्र, गटनेता निवडीच्या प्रक्रियेत शिवसेनेला विश्वासात न घेता एमआयएमच्या नगरसेवकाला गटात घेतल्यामुळे शिंदेंच्या शिवसेनेत संतापाचे वातावरण तयार झाले होते. एकतर एमआयएमला गटातून हाकलून द्या, अथवा आम्हाला या गटातून बाहेर पडण्याची परवानगी द्यावी, अशी भूमिका शिवसेना जिल्हा प्रमुख सचिन मुळूक यांनी मांडली.
परळीतील राष्ट्रवादी काँग्रेस, भाजप, शिवसेना अन् एमआयएमने एकत्रित आघाडी केल्याने याचे पडसाद राज्यभर उमटू लागले आहेत. याआधी अकोला जिल्ह्यातील अकोटमध्ये विकास मंचच्या नावाखाली सगळे पत्र एकत्र आले होते. भाजप-एमआयएम या पक्षांचाही या आघाडीत समावेश असल्याने याची राज्यभर चर्चा झाली होती. त्यानंतर दोन्ही पक्षांनी या आघाडीतून बाहेर पडण्याचा निर्णय घेतला.
त्यानंतर आता परळीत एमआयएमच्या एका नगरसेवकाला राष्ट्रवादीने सोबत घेतले. विशेष म्हणजे या आघाडीत शिवसेनाही होती. पण आम्हाला विश्वासात न घेता राष्ट्रवादीने एमआयएमला सोबत घेतल्याचा आरोप या पक्षाच्या जिल्हाप्रमुखाने केला. निवडणुकीत महायुतीत राष्ट्रवादी काँग्रेसचे 16, भाजपचे (BJP) सात तर शिवसेनेचे दोन नगरसेवक निवडून आले. त्यानंतर राष्ट्रवादी काँग्रेस आणि शिवसेना तसेच अपक्ष व एमआयएमचा गट स्थापन करुन त्याची जिल्हाधिकाऱ्यांकडे नोंद करण्यात आली.
यावर शिवसेनेचे जिल्हाप्रमुख मुळूक हे संतापले होते. गटनेता निवडीसाठी नगरसेवकांच्या नावांसमोर पक्षाचा उल्लेख नसल्याने एमआयएम गटात असल्याचे शिवसेनेला माहित नव्हते. मित्रपक्ष राष्ट्रवादीने एमआयएमला (AIMIM) गटातून वगळावे, अन्यथा शिवसेनेला गटातून बाहेर पडण्याची परवानगी द्यावी, आम्ही बाहेरून पाठिंबा देऊ, अशी भूमिका त्यांनी घेतली होती. वरिष्ठ नेत्यांच्या सूचनेवरुन जिल्हाधिकाऱ्यांची भेट घेऊन नगरसेवकांच्या सह्यांनी शपथपत्र सादर करत अधिकृत भूमिका मांडणार असल्याचे मुळूक यांनी स्पष्ट केले होते.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.