Sanjay Shirsat : संजय शिरसाट म्हणतात, आता थांबल पाहिजे! राजकीय निवृत्ती की नवे नेतृत्व पुढे आणण्यासाठीची खेळी?

Shivsena News : राज्याचे सामाजिक न्याय व छत्रपती संभाजीनगरचे पालकमंत्री संजय शिरसाट यांनी आता थांबलं पाहिजे, असं म्हणत त्यांच्या समर्थकांना आणि चाहत्यांना ऐन दिवाळीत धक्का दिला आहे. राजकाणातून निवृत्तीचे हे संकेत आहेत, की मग घराणेशाहीतून कुटुंबातीलन नव्या नेतृत्वाला पुढे आणण्यासाठीची खेळी? अशी चर्चा या निमित्ताने राजकीय वर्तुळात सुरू झाली आहे. चार टर्म आमदार आणि मंत्री झालो, आता कुठेतरी थांबलं पाहिजे असं वाटू लागला आहे, असे म्हणत शिरसाठ यांनी एका जाहीर कार्यक्रमात राजकारणातून निवृत्ती संकेत दिले.

राजकारण दिवसेंदिवस वाईट होत चालले आहे. त्यामुळे झालं तेवढं पुरे झालं आता थांबावं असं वाटतं. राजकारणात आपले हात पाय चालतात तोपर्यंत काम करावे, कोणी आपण अमृत पिऊन आलो असं समजण्याचं कारण नाही. त्यामुळे योग्य वेळी थांबण्याचा निर्णय घेतला तर ते अधिक बर असतं अशा शब्दात संजय शिरसाट यांनी आपल्या राजकीय निवृत्ती बाबत भाष्य केले. संजय शिरसाट छत्रपती संभाजीनगर पश्चिम विधानसभा मतदार संघातून सलग चौथ्यांदा विजयी झाले आहेत. त्यांच्या या प्रदीर्घ राजकीय अनुभवामुळेच उपमुख्यमंत्री एकनाथ शिंदे यांनी मुख्यमंत्री देवेंद्र फडणवीस यांच्या नेतृत्वाखाली महायुती सरकारमध्ये संजय शिरसाट यांना कॅबिनेट मंत्री केले.

त्याशिवाय छत्रपती संभाजीनगर जिल्ह्याचे पालकत्व देत त्यांचा योग्य सन्मान केल्याचे बोलले जाते. गेल्या काही महिन्यांपासून संजय शिरसाट आणि वाद हे जणू समीकरण बनले आहे. गैरव्यवहार आणि भ्रष्टाचाराच्या आरोपामुळे शिरसाट यांची चर्चा राज्यभरात झाली. सिडको भूखंडाचे प्रकरण असो की मग सामाजिक न्याय विभागातील टेंडर घोटाळा असो. याशिवाय एमआयडीसीतील जमीन, हॉटेल वेट्स खरेदी प्रकरण, कौटुंबिक वाद आणि त्यातून झालेले आरोप अशा सगळ्या परिस्थितीला तोंड देत संजय शिरसाट यांची वाटचाल सुरू आहे.

मंत्रिपद आणि जिल्ह्याचे पालकमंत्री झाल्यानंतरचा काळ शिरसाट यांच्यासाठी फारसा चांगला नव्हता. विरोधकांनी त्यांची एक एक प्रकरण बाहेर काढत त्यांच्या राजीनाम्याची मागणी लावून धरली होती. मात्र मुख्यमंत्री एकनाथ शिंदे यांची भक्कम साथ आणि देवेंद्र फडणवीस यांचा पाठिंबा या जोरावर शिरसाट मंत्रिमंडळात अजूनही कायम आहेत. असे असताना अचानक त्यांना राजकारणातून निवृत्ती व्हावे असे त्यांना का वाटले? असा प्रश्न त्यांच्या समर्थकांना पडला आहे.

सिडकोच्या जमीन घोटाळ्यावरून राष्ट्रवादी काँग्रेस शरदचंद्र पवार पक्षाचे आमदार रोहित पवार यांनी शिरसाट यांच्याविरोधात रान पेटवले आहे. सिडकोच्या मुंबई येथील कार्यालयावर मोर्चा काढत संजय शिरसाट यांचा तात्काळ राजीनामा घ्या, अशी मागणी रोहित पवार यांनी लावून धरली होती. या प्रकरणात बाराशे पानांचे पुरावे मुख्यमंत्री देवेंद्र फडणवीस यांच्याकडे रोहित पवारांनी सादर केले. मात्र त्यावर कुठलीही कारवाई झाली नाही. उलट शिरसाट यांना मुख्यमंत्र्यांनी पाठिंबा देत राजकारणात असे आरोप नेहमीच होत असतात, असे म्हणत त्यांचा बचाव केला.

एकनाथ शिंदे यांचे विश्वासू सहकारी म्हणून संजय शिरसाट ओळखले जातात शिवसेनेतील बंडामध्ये शिंदे यांच्या खांद्याला खांदा लावून शिरसाट सहभागी झाले होते. पक्षाचे प्रवक्ते म्हणून राज्य पातळीवर शिरसाट यांनी जोरदारपणे बाजू मांडत आपला राजकीय अनुभव आणि कौशल्य पणाला लावत विरोधकांच्या आरोपांना सडेतोड उत्तरं दिल्याचे दिसून आले. सगळं काही सुरळीत सुरू असताना शिरसाट यांनी राजकारणातून निवृत्त होण्यासंदर्भात केलेल्या विधानाने त्यांच्या मतदारसंघात खळबळ उडाली आहे. आता राजकारणातील निवृत्ती ही संजय शिरसाट यांच्या कारकिर्दीवर पूर्णविराम ठरणार की मग घराणेशाहीची परंपरा पुढे सुरू ठेवत शिरसाट यांच्या कुटुंबातील नवे नेतृत्व पुढे आणण्यासाठी केलेले जाणीवपूर्वक हे विधान आहे? हे येणाऱ्या काळातच स्पष्ट होईल.

FAQs

1. संजय शिरसाट खरंच राजकारणातून निवृत्त होणार आहेत का?
अजून अधिकृत घोषणा झालेली नाही, पण निवृत्तीबाबत चर्चेला जोर आला आहे.

2. त्यांच्या कुटुंबातून नवे नेतृत्व पुढे येणार आहे का?
होय, स्थानिक सूत्रांच्या माहितीनुसार त्यांच्या मुला-मुलीने राजकीय सक्रियता वाढवली आहे.

3. छत्रपती संभाजीनगरच्या राजकारणावर या निर्णयाचा काय परिणाम होईल?
शिवसेनेच्या संघटनेत मोठे बदल घडू शकतात.

4. हा निर्णय फक्त रणनीतीचा भाग आहे का?
काही तज्ज्ञांच्या मते ही निवृत्तीची घोषणा प्रत्यक्षात पुढील पिढीला संधी देण्यासाठीचा राजकीय डाव असू शकतो.

5. संजय शिरसाट यांच्या जागी कोण उमेदवार पुढे येऊ शकतो?
अजून निश्चित नाही, पण त्यांच्या घरातूनच कोणी उमेदवारी घेईल अशी चर्चा सुरू आहे.