Sanjay Shirsat On Chandrakant Khaire : 'मामू'नां विरोधाची चंद्रकांत खैरेंची भूमिका योग्यच, संजय शिरसाटही सहमत!

Shivsena News : शिवसेना पक्षातून फुटून बाहेर गेलेले पालकमंत्री संजय शिरसाट आणि शिवसेना उद्धव बाळासाहेब ठाकरे पक्षाचे नेते चंद्रकांत खैरे यांच्यातून विस्तवही जात नाही. अनेकदा हे दोघेही एकमेकांवर तुटून पडल्याचे पहायला मिळाले. परंतु खैरे यांच्या एका भूमिकेला संजय शिरसाट यांनी चक्क पाठिंबा दर्शवला आहे. उद्धव ठाकरेंच्या पक्षाचे दुसरे नेते अंबादास दानवे यांनी माजी महापौर अब्दुल रशीद खान उर्फ मामू यांना पक्षात आणले.

मातोश्रीवर गुपचूप त्यांचा प्रवेश करून घेतला. याला चंद्रकांत खैरे यांनी टोकाचा विरोध करत त्यांना उमेदवारी मिळू देणार नाही, असे म्हणत दंड थोपटले. चंद्रकांत खैरे यांचा हा आक्रमकपणा, मामूंच्या प्रवेशाला विरोध आणि दानवेंच्या एकाधिकारशाहीला आव्हान यावर संजय शिरसाट (Sanjay Shirsat) खूष झाले आहेत.

केवळ मतांच्या लाचारीसाठी एखाद्याला पक्षात प्रवेश देणे चुकीचे आहे, अशावेळी चंद्रकांत खैरे (Chandrakant Khaire) यांच्या सारख्या नेत्याला राग येणे सहाजिकच आहे. खैरे यांचा रशीद मामूला असलेला विरोध योग्यच असल्याचे म्हणत शिरसाट यांनी थेट खैरेंची बाजूच घेतली.

संजय शिरसाट हे उद्धव सेनेतील इतर नेत्यांवर टीका करतात, पण चंद्रकांत खैरे यांच्यावर टोकाची किंवा खालच्या स्तरावर जाऊन त्यांनी कधी टीका केली नाही. उलट खैरे-दानवे यांच्या वादात खैरे यांची बाजू आणि त्यांनी शिवसेना वाढीसाठी घेतलेल्या कष्टाचे शिरसाट यांच्याकडून वेळोवेळी गुणगाण करण्यात आल्याचे दिसून आले आहे. लोकसभा निवडणुकीत चंद्रकांत खैरे यांना एकनाथ शिंदे यांच्या पक्षाकडून संभाजीनगरची उमेदवारी देण्याची आॅफरही संजय शिरसाट यांनीच खैरे यांना दिल्याचा गौप्यस्फोट केला होता.

आता अब्दुल रशीद खान उर्फ मामू यांच्या पक्ष प्रवेशावरून शिवसेना उद्धव बाळासाहेब ठाकरे पक्षात सुरू असलेल्या वादात संजय शिरसाट यांनी उडी घेतली. उद्धव ठाकरे यांचा पक्ष आता मामू पक्ष झाल्याचा टोला लगावतानच शिरसाट यांनी खैरे यांनी या प्रवेशाला केलेल्या विरोधाला हवा देण्याचे काम त्यांची बाजू घेत केले आहे. अशा चुकीच्या निर्णयामुळेच त्या पक्षात आता कोणी थांबायला तयार नाही, सगळे पक्ष सोडून चालले आहेत, असे शिरसाट म्हणाले.