Hemant Patil On Ashok Chavan : नांदेडची वाट लावली म्हणत आधी टीका, आता महापालिकेतील युतीसाठी शिवसेनेचे अशोक चव्हाणांना साकडे!

Shivsena-BJP News : नगरपालिका-नगरपंचायत निवडणुकीत शिवसेनेच्या तीनही आमदारांनी युतीसाठी जिल्ह्यातील भाजपचे नेते अशोक चव्हाण यांची दोन वेळा भेट घेतली होती. परंतु, त्यांनी त्यावेळी युती केली नाही. आता महापालिकेत भाजपने शिवसेनेशी युती करावी, अशी आमची विनंती असल्याचे आमदार हेमंत पाटील यांनी म्हटले आहे. अशोक चव्हाण यांनी नांदेडची वाट लावली, महापालिकेच्या मोक्याच्या जागा बिल्डरांच्या घशात घातल्या, बीओटी आणत त्यातून पैसा कमावला, असा गंभीर आरोप हेमंत पाटील यांनी नगरपालिका निवडणुकी दरम्यान चव्हाण यांच्यावर केले होते.

आता नगरपालिका, नगरपंचायत निवडणुका संपल्या आहेत, काही पालिका, पंचायतीच्या निवडणुका 20 डिसेंबर रोजी होणार आहेत. एकत्रित निकाल 21 रोजी जाहीर होणार आहे. दरम्यान, महापालिकेच्या निवडणुका जाहीर झाल्याने नांदेड-वाघाळा महापालिकेसाठी शिवसेना-भाजप युतीसाठी शिवसेनेने पाच जणांची समिती गठीत केली आहे. ही समिती युतीसाठी भाजपच्या स्थानिक नेत्यांशी चर्चा करणार आहे. या पार्श्वभूमीवर अशोक चव्हाण यांनी महापालिकेसाठी शिवसेनेशी युती करावी, अशी विनंती आमदार हेमंत पाटील यांनी केली आहे.

नगरपालिका, नगरपंचायत निवडणुकीत त्यांनी आमच्या युतीचा प्रस्ताव फेटाळला होता. महापालिकेत तरी त्यांनी युती करावी, अशी आमची इच्छा आहे. पण ते युती करणार नाहीत, असेही हेमंत पाटील यांनी स्पष्ट करून टाकले. युती झाली नाही, तर आमचीही स्वतंत्र लढण्याची तयारी असल्याचे पाटील यांनी स्पष्ट केले. युतीसाठी राज्य पातळीवर ज्या पक्षाचा आमदार त्या पक्षाला 60 टक्के आणि युतीतील इतर मित्र पक्षांना प्रत्येकी 20 टक्के जागा असा अलिखित फाॅर्म्युला ठरला असल्याचा दावाही हेमंत पाटील यांनी केला.

शिवसेना इच्छुकांच्या मुलाखती आणि अर्ज वाटपाला बुधवारपासून नांदेडमध्ये सुरूवात झाली आहे. शिवसेनेकडून भाजपकडे युतीचा प्रस्ताव गेला असला तरी तो अशोक चव्हाण स्वीकारणार नाही, याचा अंदाज हेमंत पाटील यांनी आधीच वर्तवला आहे. महापालिकेची सत्ता असताना अशोक चव्हाण यांनी मोक्याच्या जागा बिल्डरांना विकल्या, बीओटीवर प्रकल्प राबवून त्याचे कंत्राट आपल्याच मित्रांना देत पैसा कमावल्याच्या आरोपाचा पुनरुच्चारही हेमंत पाटील यांनी पुन्हा केला.

भाजपकडून युतीसाठी न मिळणारा प्रतिसाद आणि हेमंत पाटील यांच्याकडून अशोक चव्हाण यांच्यावर होणारी टीका पाहता केवळ राज्य पातळीवर युतीचा आग्रह असल्याने इच्छा नसताना एकमेकांना प्रस्ताव पाठवण्याचा सोपस्कार पार पाडला जात असल्याचे दिसते. जागा वाटपावरून बिनसले असे सांगत शिवसेना-भाजप महापालिकेत स्वबळावर लढतील, अशी शक्यताही वर्तवली जात आहे. दुसरीकडे अशोक चव्हाण हे ही युतीसाठी फारसे उत्सूक नसल्याचे दिसते. शिवसेनेशी युती झाली तरी राष्ट्रवादी काँग्रेसला सोबत घेण्याचा प्रश्नच नसल्याचे चव्हाण यांनी याआधीच स्पष्ट केले आहे.