Ambadas Danve News : निष्क्रिय गृहमंत्र्यांमुळे पोलिसांवर आमदाराची गाडी धुण्याची वेळ..

Shivsena UBT Political News : मालवणच्या राजकोट किल्ल्यावर सत्ताधारी पक्षाचे खासदार नारायण राणे व त्यांचे सुपुत्र निलेश राणे पोलिसांच्या अंगावर धावून गेले. यावरून राज्याचे गृहमंत्री देवेंद्र फडणवीस आणि त्याच्या विभागावर विरोधकांकडून टीकेची झोड उठवली जात आहे. त्यातच शिवसेना शिंदे गटाचे बुलडाण्याचे संजय गायकवाड यांची गाडी एक पोलिस कर्मचारी पाणी टाकून धुऊन काढत असल्याचा कथित फोटो शिवसेना नेते तथा विधान परिषदेचे विरोधी पक्षनेते अंबादास दानवे यांनी आपल्या सोशल मिडियावर व्हायरल केला.

या फोटोने एकच खळबळ उडाली असून सत्तेचा दुरुपयोग करत आमदार पोलिसांना कशी हीन वागणूक देत आहेत, असा प्रश्न उपस्थित केला आहे. (Ambadas Danve) राज्यातील कायदा व सुव्यवस्था, महिला, मुली, विद्यार्थीनींवरील वाढते अत्याचार यावरून महायुतीचे सरकार विशेषतः गृहमंत्री देवेंद्र फडणवीस आणि त्यांचे गृहखाते सध्या विरोधकांच्या निशाण्यावर आहे.

मालवणच्या राजकोट किल्ल्यावर छत्रपती शिवाजी महाराजांचा पुतळा कोसळल्यानंतर काल ठाकरे आणि राणे समर्थकांमध्ये जोरदार राडा झाला. यावेळी राणे यांचे पुत्र नीलेश यांनी पोलिस अधिकाऱ्यांशी हुज्जत घातली. यावरूनही सरकारवर टीका होत असताना दानवे यांनी व्हायरल केलेल्या फोटोवरून गदारोळ सुरू झाला आहे.

अंबादास दानवे म्हणाले, पोलीसांवर कुत्र्यासारखा धावून जाणारा नपुसंक काल बघितलाच आपण. महाराष्ट्राचे गृहमंत्री एवढे निष्क्रिय की, आत्ता पोलिसांना सत्ताधारी आमदारांची गाडीपण धुऊन द्यायची वेळ आली. (Devendra Fadnavis) शिंदे गटाचे आमदार संजय गायकवाड यांची गाडी धुताना महाराष्ट्र पोलिस. फडणवीसांनी पोलीसांची काय दुर्दशा करून ठेवलीय, असा टोला अंबादास दानवे यांनी लगावला.

राज्याचे मुख्यमंत्री एकनाथ शिंदे, गृहमंत्री देवेंद्र फडणवीस याकडे लक्ष देतील का? असा सवाल या निमित्ताने दानवे यांनी उपस्थीत केला. बदलापूर येथील बालिकांवर अत्याचाराची घटना उघडकीस आल्यानंतर राज्यात संतापाचे वातावरण आहे. विशेषतः देवेंद्र फडणवीस व त्यांचे गृहखाते सध्या विरोधकांच्या निशाण्यावर आहे.