राऊतसाहेब, आमच्याही मर्यादा आता संपल्यात! भूमरेंनी थेट आव्हानच दिलं

मुंबई : शिवसेनेचे (Shiv Sena) बंडखोर आमदार संदीपान भूमरे आणि खासदार संजय राऊत (Sanjay Raut) यांच्यामध्ये चांगलीच जुंपली आहे. दोन्ही नेत्यांचे एकमेकांवर आरोप-प्रत्यारोप सुरू आहे. मंत्री झाल्यानंतर भूमरे यांनी आपल्यासमोर लोटांगण घातल्याचा दावा राऊतांनी केला आहे. त्याला भूमरे यांनी प्रत्युत्तर देत लोटांगण घातल्याचा दावा खोटा असल्याचे सांगितले. तसेच आता आमच्याही मर्यादा संपल्या आहेत, असं सांगत त्यांनी राऊतांना सूचक इशारा दिला. (Sandipan Bhumre Latest News)

राऊतांनी गुरूवारी पत्रकार परिषदेत भूमरेंवर टीका केली. ते म्हणाले होते की, संदीपान भूमरे मंत्री झाले तेव्हा सामना कार्यालयात येऊन त्यांनी माझ्यासमोर प्रेमानं लोटांगण घातलं होतं. साहेब, तुम्ही होतात म्हणून सरकार आलं आणि आम्ही मंत्री झालो, असं त्यावेळी भूमरे म्हणाल्याचा दावा राऊतांनी केला आहे.

त्यानंतर भूमरे यांनीही एका वृत्तवाहिनीशी बोलताना राऊतांवर टीका केली. ते म्हणाले, मी मंत्री झाल्यानंतर त्यांचे धन्यवाद मानण्यासाठी भेट घेतली होती. मी एक कार्यकर्ता आहे. 35 वर्षे शिवसेनेसाठी झटलो. मंत्री झालो. मंत्री झाल्यानंतर फक्त आभार व्यक्त केले. लोटांगण घालण्याचा प्रश्नच येत नाही.

राऊतांच्या बोलण्याकडे एवढं लक्ष देऊ नका. रोज तेच-तेच बोलतात. लोकांनासुध्दा त्यांचं ऐकायचा कंटाळा आला आहे. राऊत टीव्हीसमोर आले की लोकं टीव्ही बंद करत आहेत, अशी परिस्थिती महाराष्ट्रात आहे. संजय राऊतांनीही आता शांत बसलं पाहिजे. टीका केली पाहिजे, पण कोणत्या पातळीवर केली पाहिजे, यालाही मर्यादा आहे. आमच्याही मर्यादा आता संपलेल्या आहेत, असा इशारा भूमरे यांनी दिला.

पाटणमधून निवडणूक लढवली तर आनंदच

आम्हीही 3 ते 4 लाख मतांतून निवडून आलो आहे. आम्ही आयते निवडून आलो नाही. राऊतांनी राजीनामा देत जनमतातून निवडून येऊन दाखवावे. तरच आम्ही त्यांना मानू. जनमतातून कसं निवडून यावं लागतं, ते त्यांना कळेल, असं आव्हान भूमरे यांनी दिलं. पाटणमधून राऊत निवडणुकीसाठी उतरले तर काय कराल, या प्रश्नावर भूमरे यांनी आनंदच होईल, असं उत्तर दिलं. त्याचा निकाल काय लागेल, यावर मात्र भूमरे यांनी बोलायचं टाळलं. त्यांनी आधी येऊन तर दाखवावे, असं आव्हानच भूमरे यांनी दिलं.