Shivsena : औरंगाबादमध्ये राजकीय नाट्य : शिंदे-ठाकरे गटाचे नेते बसले शेजारी-शेजारी, पुढे असं काही घडलं की...

Shivsena : यंदाचा प्रजासत्ताक दिन (Republic Day) औरंगाबादेत राजकीय नाट्याचा ठरला. शिंदे आणि ठाकरे गटाचे नेते एकाच कार्यक्रमात एकत्र आलेले दिसले. औरंगाबादमधील प्रजासत्ताक दिनाच्या कार्यक्रमात, दोन्ही गटांचे नेते शिवसेनेतल्या फुटीनंतर पहिल्यांदाच मंचावर शेजारी बसलेले दिसले.

शिंदे गटाचे संजय शिरसाट आणि ठाकरे गटाचे चंद्रकांत खैरे यांना एकाच आसनावर शेजारी बसलेले पाहून अनेकजण अचंबित झाले. एकाच सोफ्यावर बसल्यानंतर दोघांनी एकमेकांकडे पाहिले देखील नाही. तोंडातून चकार शब्दही काढला नाही. पालकमंत्री असलेले संदीपान भुमरे यांनी कार्यक्रमाच्या संकेताप्रमाणे, भाषण करून उपस्थित मान्यवरांना शुभेच्छा देण्यासाठी आले, पण यावेळी चंद्रकांत खैरे शुभेच्छा न देताच तिथून निघून गेले. मात्र यावेळी विरोधीपक्ष नेते अंबादास दानवे यांनी प्रसंगावधान दाखवत परिस्थिती सांभाळून घेतली. दोन्ही गटाच्या नेत्यांमध्ये आजही प्रचंड वितुष्ट असल्याचे दिसून येते.

दरम्यान, मंत्री महोदय तुम्हाला शुभेच्छा द्यायला आले, तरी का उठून गेलात असा प्रश्न खैरेंना विचारण्यात आले. या प्रश्नाला उत्तर देताना खैरे म्हणाले,"हे मंत्री आणि सरकार घटनाबाह्य आहे." खैरेंच्या या विधानावर संदिपान भुमरे प्रत्युत्तर देत म्हणाले, "त्यांनीअपमान केला आहे. मुळात यांना घटनाबाह्य पालकमंत्री असं म्हणण्याचे अधिकार कुणी दिलेत? मी घटनाबाह्य आहे की नाही हे ठरवण्यासाठी हे सुप्रीम कोर्ट आहेत का? खैरे सतत काहीही बोलत राहतात. कारण जे काही चाललंय, ते खैरै यांना सहन होत नाही, त्यांना पाहावलं जात नाही, म्हणून ते असलं काही बोलत राहतात."