Kalamnuri Assembly Constituency: पाडापाडीच्या यादीत नाव येताच संतोष बांगर समर्थकांचा ताफा अंतरवालीकडे निघाला

Maharashtra Assembly Election 2024 : मराठा आरक्षण आंदोलक मनोज जरांगे पाटील यांनी विधानसभा निवडणुकीत उमेदवार जाहीर करण्यासाठी आज अंतरवाली सराटीत बोलावलेल्या इच्छुक उमेदवारांच्या बैठकीत एकापाठोपाठ एक धमाके करायला सुरुवात केली आहे. कोणत्या मतदारसंघातून थेट उमेदवार देणार, कोणत्या मतदारसंघात पाडण्याची भूमिका घेणार आणि कोणत्या मतदारसंघांमध्ये उमेदवार न देता पाठिंबा देणार या सगळ्याच गोष्टींचा खुलासा सकाळी सात वाजेपासून सुरू असलेल्या बैठकीनंतर जाहीर करत आहेत.

जिल्हानिहाय मनोज जरांगे पाटील (Manoj Jarange Patil) मतदार संघाची नावे घेऊन तिथे काय करायचे हे सांगत आहेत. मराठवाड्यातील अनेक जिल्ह्यांमध्ये जरांगे पाटील यांनी उमेदवार पाडण्याची भूमिका जाहीर केली आहे. यामध्ये हिंगोली जिल्ह्यातील कळमनुरी मतदार संघाचा समावेश आहे. इथे शिवसेनेचे संतोष बांगर हे विद्यमान आमदार आहेत.

मनोज जरांगे पाटील यांनी कळमनुरी मध्ये पाडण्याची भूमिका जाहीर केल्यानंतर बांगर यांचे शेकडो समर्थक शंभरहून अधिक गाड्यांमध्ये अंतरवाली सराटीकडे निघाल्याची माहिती आहे. मनोज जरांगे पाटील यांनी कळमनुरी मतदार संघाबाबत घेतलेली भूमिका मागे घ्यावी आणि आम्हाला पाठिंबा द्यावा, असे साकडे बांगर समर्थक जरांगे पाटील यांना भेटून घालणार असल्याचे बोलले जाते.

बांगर यांच्याप्रमाणेच इतर मतदारसंघातील आमदार व इच्छुक उमेदवारांचे समर्थकही अंतरवालीत दाखल होणार असल्याची माहिती आहे. (Santosh Bangar) दरम्यान मनोज जरांगे पाटील यांनी भूमिका जाहीर केल्यानंतर मराठवाड्यात आणि राज्यभरात एकच खळबळ उडाली आहे. सर्व राज्यातील मतदारसंघाबाबतची भूमिका येत्या दहा तारखेपर्यंत जाहीर करणार असल्याचे मनोज जरांगे पाटील यांनी माध्यमांशी बोलताना सांगितले आहे.

या मतदारसंघात पाडणार..

मनोज जरांगे पाटील यांनी मराठवाड्यातील भोकरदन, कळमनुरी, औसा, गंगापूर, गंगाखेड आणि जिंतूर या मतदारसंघात पाडण्याची भूमिका निभावणार असल्याचे जाहीर केले आहे.