Beed Crime News : बीड जिल्ह्यातील उपसरपंचाचा संशयास्पद मृत्यू ; डोक्यात गोळी घुसलेला मृतदेह कारमध्ये आढळला..

Marathwada News : बीड जिल्ह्याच्या गेवराई तालुक्यातील लुखामसला गावचे उपसरपंच गोविंद जगन्नाथ बरगे यांचा मृतदेह सासुरे गाव शिवारातील कारमध्ये आढळून आला. कारमध्येच त्यांच्या शेजारी पिस्तुल आढळले. शिवाय पोस्टमार्टम रिपोर्टमध्ये बरगे यांच्या डोक्याला गोळी लागल्याचे आढळून आले आहे. त्यामुळे ही हत्या आहे की आत्महत्या? याबद्दल संशय व्यक्त केला जात आहे. दरम्यान, या घटनेने पुन्हा एकदा बीड जिल्हा हादरला आहे.

मस्साजोगचे सरपंच संतोष देशमुख यांचे अपहरण आणि त्यानंतर झालेल्या निर्घृण हत्या प्रकरणाच्या जखमा ताज्या असतानाच आता उपसरपंच बरगे यांच्या संशयास्पद मृत्यूने खळबळ उडाली आहे. (Beed News) ही घटना सोलापूर जिल्ह्याच्या बार्शी तालुक्यातील सासुरे गावात मंगळवारी सकाळी उघडकीस आली. गोविंद जगन्नाथ बरगे (वय 38) रा. लुखामसला ता. गेवराई असे मृत झालेल्या उपसरपंच यांचे नाव आहे.

सोमवारी गोविंद बरगे हे खासगी कामानिमित्त बार्शी (जि. सोलापूर) या ठिकाणी कारने गेले होते. मंगळवारी(ता. 9) सकाळी बरगे यांचा सासुरे गाव शिवारात कारमध्ये मृतदेह आढळून आला. (Georai) या घटनेची माहीती मिळताच वैराग पोलीस ठाण्याचे सहायक पोलीस निरीक्षक कुंदन गावडे हे पोलिस पथकासह घटनास्थळावर दाखल झाले. घटनेची पाहणी करत पंचनामा करण्यात आला. त्यानंतर मृतदेह उत्तरीय तपासणीस पाठविण्यात आला.

दरम्यान, गोविंद बरगे यांच्या डोक्याला पिस्तुलची गोळी लागल्याची जखम आढळून आली आहे. त्यांच्या कारमध्ये मृतदेहाजवळ पिस्तुलही सापडले. त्यामुळे बरगे यांची गोळी झाडून हत्या झाली, की त्यांनी आत्महत्या केली? याची चर्चा जिल्हाभरात होत आहे. या घटनेने बीड जिल्ह्यात पुन्हा एकदा दहशतीचे वातावरण निर्माण झाला आहे. उपसरपंच बरगे यांचा कोणाशी काही वाद होता का? ते बार्शीला नेमके कशासाठी गेले होते? त्यांच्यासोबत कोण कोण होते? याचा तपास पोलीस करत आहेत.