Latur : दोन स्वीकृत सदस्यांसाठी दहा अर्ज ; राज्यमंत्री बनसोडे घेणार निर्णय

जळकोट : नगरपंचायतीच्या दोन स्वीकृती सदस्यांची निवड आज होणार होती. परंतु दहा अर्ज आल्याने पेच निर्माण झाला आणि गट नेत्यानेच दांडी मारली. (Ncp) त्यामुळे आज या दोन स्वीकृत सदस्यांची निवड होऊ शकली नाही. (Congress) पीठासीन अधिकारी तथा उपजिल्हाधिकारी प्रवीण मेगशेट्टी यांनी निवड प्रक्रिया पुढे ढकलली आहे. (Latur)

नुकत्याच झालेल्या नगरपंचायत निवडणुकीत महाविकास आघाडीने बहुमतासह सत्ता मिळवली. नगराध्यक्ष, उपनगराध्यांची निवडही पार पडली. त्यानंतर दोन स्वीकृत सदस्यांच्या निवडीसाठी आज सभा बोलावण्यात आली होती. सगळे सदस्य, पीठासीन अधिकारी नगरपंचायत सभागृहात दुपारी बारा वाजता हजर होते. महाविकास आघाडीकडे पूर्ण बहुमत असताना इच्छुकांची संख्या जास्त झाल्याने यातील कोणाची नावे द्यायची, असा पेच निर्माण झाला.

महाविकास आघाडीकडून दोन स्वीकृत सदस्यांसाठी दहा उमेदवारांनी अर्ज दाखल केले होते. निवडीचा अधिकार राष्ट्रवादी काँग्रेस आणि काँग्रेसच्या गटनेत्यांकडे होता. यात राष्ट्रवादी काँग्रेसला एक व काँग्रेस-शिवसेनेला एक स्वीकृत सदस्य निवडीचा अधिकार होता. परंतु, कुणाची निवड करावी, यावर एकमत झाले नाही.

निवडीची वेळ होईपर्यंत महाविकास आघाडीतील दोन्हीही गटनेते दिलेल्या वेळेत सभागृहात उपस्थित राहिले नाहीत. त्यामुळे पीठासीन अधिकारी मेगशेट्टी यांनी ही निवड प्रक्रिया पुढे ढकलली. महाविकास आघाडीकडे पूर्ण बहुमत असतानासुद्धा दोन स्वीकृत सदस्य निवडीच्या दिवशी नाट्य रंगल्याने शहरात चर्चेला उधाण आले होते.

नगरपंचायतीच्या स्वीकृत सदस्यांचा तिढा राज्यमंत्री संजय बनसोडे यांच्याकडे गेला आहे. ते मतदारसंघात आल्यानंतर पुढील दिशा ठरणार आहे. ते काय निर्णय घेतात याकडे कार्यकर्त्यांचे लक्ष लागले आहे. भविष्यात नगरसेवकांमध्ये नाराजी पसरू नये यासाठी काँग्रेसचे गटनेते मन्मथ किडे आणि राष्ट्रवादी काँग्रेसचे गटनेते ॲड. तात्या पाटील यांनी महाविकास आघाडीतील वरिष्ठ नेत्यांशी चर्चा करून आजची निवड टाळल्याचे बोलले जात आहे.