Vaibhavi Deshmukh HSC Result : वडिलांच्या हत्येनंतर बारावीची परीक्षा दिलेली वैभवी निकाल लागताच गहिवरली!रडत रडत म्हणाली,...

Vaibhavi Deshmukh Result : बारावीचा निकाल आज जाहीर झाला. मस्साजोगचे सरपंच संतोष देशमुख यांची कन्या वैभवी देशमुख हिने तब्बल 85.33 टक्के गुण मिळवले. वडिलांच्या हत्येनंतर त्यांना न्याय मिळावा म्हणून वैभवी महाराष्ट्रभर फिरत होती. आज निकाल जाहीर होताच ती वडिलांच्या आठवणीने भावूक झाली.

वैभवी म्हणाली, 'मला याचं दुःख वाटतंय की माझे वडील माझ्यासोबत नाही. ते जर असते तर त्यांना हा निकाल ऐकुण फार आनंद झाला असता. त्यांच्या शब्बासकीची थाप माझ्या पाठीवर पडली असती. देशमुख कुटुंबावरच नव्हे तर संपूर्ण गावावर दुखःचा डोंगर कोसळला होता. पेपर देणं मला शक्य नव्हतं. सगळ्यांनी मला सांगितलं की तुला तुझ्या करियरकडे लक्ष द्यावं लागेल. त्यानंतर मी बारावीची परीक्षा दिली होती.'

'माझे वडील होते तेव्हा स्वप्न खुप वेगळे होते. माझी नेटची तयारी सुरू होती. या निकालाने स्वप्न पूर्ण झालं असले तरी त्यात माझे वडील माझ्यासोबत नाही हे दुख:आहेच. एकीकडे आनंद वाटतोय तर एकीकडे दुःख वाटत आहे', असे सांगताना वैभवीचे डोळे पाणावले.

वडिलांना न्याय मिळावा...

'माझ्या करिअरची परीक्षा मी पास झाले तरी पण माझ्यासाठी वडिलांना न्याय मिळवून देणे ही माझी प्राथमिकता असणार आहे. आमच्यासाठी जे काही होते ते आमचे वडीलच होते. आता ते नाहीत पण त्यांच्या स्मृती जपण्यासाठी जे मला काही करावे लागेल ते मी करेल.', असे देखील वैभवीने सांगितले.तसेच आपण नेटची परीक्षा दिली होती पण पेपर आपल्याला अवघड गेला. सीईटीचा निकाल लागल्यानंतर करिअरची पुढची दिशा ठरवू, असे देखील वैभवीने सांगितले.