Beed News : मस्साजोग (ता. केज) येथील सरपंच संतोष देशमुख यांचे अपहरण आणि हत्या प्रकरणातील मुख्य सुत्रधार वाल्मिक कराड याचा जामीन अर्ज आज विशेष मकोका न्यायाधीश व्यंकटेश पटवदकर यांच्या न्यायालयाने फेटाळला. वाल्मीकवर गंभीर गुन्हा असल्याचे निरीक्षण न्यायालयाने नोंदविले आहे. दरम्यान, याच प्रकरणातील दुसऱ्या क्रमांकाचा आरोपी विष्णू चाटे याच्या दोषमुक्तीच्या मागणीवरील निकाल प्रलंबीत असून उर्वरित आरोपींच्या दोषमुक्तीच्या अर्जावरील आज होणारी सुनावणी पुढे ढकलली आहे. आता ही सुनावणी 10 सप्टेंबरला होणार आहे.
वाल्मीक कराडचा (Walmik Karad) दोषमुक्तीचा अर्ज न्यायालयाने फेटाळल्यानंतर त्याने जामीनासाठी अर्ज केला होता. कराडचा जामीन अर्ज आणि चाटेच्या दोषमुक्तीच्या अर्जावर यापूर्वी 18 ऑगस्टला सुनावणी पार पडली. सरपंच संतोष देशमुख यांचे 9 डिसेंबर 2024 रोजी मस्साजोग जवळून अपहरण करून त्यांची निर्घृण हत्या करण्यात आली. विशेष तपास पथकाने वाल्मीक कराड, विष्णू चाटे, सुदर्शन घुले, प्रतीक घुले, महेश केदार, सुधीर सांगळे व फरार कृष्णा आंधळे यांच्यावर ठपका ठेवला आहे. या आराोपींवर मकोका अंतर्गत कारवाई केली असून सर्व आरोपी कारागृहात आहेत.
दरम्यान, विष्णू चाटे याच्या दोषमुक्तीच्या अर्जावरील सुनावणी यापूर्वीच पुर्ण झाल्याने त्यावरील निकाल न्यायालय कधीही देऊ शकते. मात्र, प्रतीक घुले, महेश केदार, सुधीर सांगळे या आरोपींच्या दोषमुक्ती अर्जावर फिर्यादींचे म्हणणे अद्याप आलेले नाही. (Beed News) तसेच, आज या आरोपींचे वकील दिग्वीजय पाटील देखील अनुपस्थित होते. त्यामुळे अॅड. विकास खाडे यांनी सुनावणीची पुढील तारीख मागीतली. पुढील सुनावणी 10 सप्टेंबरला होणार आहे. सरकारी पक्षाकडून विशेष सहाय्यक सरकारी वकिल अॅड. बाळासाहेब कोल्हे उपस्थित होते.
18 आॅगस्ट रोजी झालेल्या सुनावणीत अॅड. उज्जवल निकम यांनी वाल्मिक कराड याच्या जामीन अर्जाला तीव्र विरोध केला. तसेच इतर आरोपींनी केलेले दोषमुक्तीचे अर्ज फेटाळून त्यांना कुठल्याही प्रकारची सवलत दिली जाऊ, नये अशी मागणी करत जोरदार युक्तीवाद केला. बीडच्या मकोका कोर्टात तीन तास सुनावणी पार पडली. हा खटला गंभीर असून आरोपींना कुठलीही सवलत मिळू नये, असा पवित्रा निकम यांनी घेतला होता.
वाल्मिक कराडला जामीन मिळतो का? इतर आरोपींच्या दोषमुक्ती अर्जावर न्यायालय काय निकाल देते, याची उत्सूकता संपूर्ण जिल्ह्याला होती. परंतु न्यायालयाने गेल्यावेळी निकाल राखून ठेवला होता. उज्जवल निकम यांनी वाल्मिक कराड यांच्या वकीलांचे सगळे मुद्दे खोडून काढले होते. विष्णू चाटे याच्या दोषमुक्ती अर्जाला विरोध करताना खंडणीच्या प्रकरणात विष्णू चाटे हा वाल्मीक कराडचा राईट हॅन्ड होता आणि त्यानेच कराडला मदत केल्याचे निकम यांनी न्यायालयाला सांगितले होते.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.