MNS Slams Nishikant Dubey : राज ठाकरेंना गल्लीतला '**' म्हणणाऱ्या भाजप खासदाराला मनसे नेत्याचे प्रत्युत्तर; म्हणाला, 'काहीजण भुंकत...'

Dombivli News : भाजप खासदार निशिकांत दुबे यांनी मनसेप्रमुख राज ठाकरे आणि शिवसेना उद्धव बाळासाहेब ठाकरे पक्षाचे प्रमुख उद्धव ठाकरेंवर यांच्यावर खालच्या पातळीवर टीका केली होती. त्यावरून आता विविध राजकीय प्रतिक्रिया उमटू लागल्या आहेत. यावर मनसेचे नेते माजी आमदार राजू पाटील यांनी देखील दुबेंच्या वक्तव्याचा समाचार घेतला असून काहीजण भुंकत असतात आम्ही त्याकडे लक्ष देत नाही. ते ज्या राज्याचे प्रतिनिधित्व करतात त्यापेक्षा दहा पट जास्त जीएसटी आम्ही देतो. त्यांना दहा वर्षात जमनार नाही तेवढं महाराष्ट्र एका वर्षात देत आणि हे आम्हाला शिकवणार का? असा सवाल देखील पाटील यांनी केला आहे.

गरीब हिंदी भाषिकांना काय मारता? उत्तर प्रदेश, बिहार, तामिळनाडूत या तुम्हाला उचलून आपटू असं आव्हान देत दुबे यांनी राज ठाकरे आणि उद्धव ठाकरे यांना दिल होत. त्यानंतर आता यावरून मोठं राजकारण तापलं आहे. यावर आता विविध राजकीय प्रतिक्रिया उमटू लागल्या आहेत. राजू पाटील यांनी दुबे यांच्या आव्हानावर पलटवार केला आहे.

राजू पाटील म्हणाले की, तुमच्याकडे गुन्हेगारी आहे, व्यापाऱ्यांचे अपहरण करून खंडण्या वसूल केल्या जातात. त्यासाठी तुमच्या जातीचे व्यापारी तिथे राहत नाहीत. याच कुठेतरी त्यांनी आता परीक्षण करायला पाहिजे. आता कुठे उत्तर प्रदेशची परिस्थिती सुधारते आहे. परंतु हे महाराष्ट्रात का आले? तुमच्याकडे पोषक भूमी नाही म्हणूनच आले ना! त्यामुळे दुबेंनी स्वतःचे आत्मपरीक्षण आणि आत्मचिंतन करून बोलावे असा टोलाही राजू पाटील यांनी लगावला आहे.

काय म्हणाले होते दुबे?

दुबे यांनी राज ठाकरे आणि उद्धव ठाकरे तुम्ही हिंदी भाषकांना मारताय? उर्दू बोलणाऱ्यांना मारुन दाखवा. मराठी आंदोलक हे सलाऊद्दीन, मसूद अजहर, दाऊदसारखे आहेत. दहशतवाद्यांनी हिंदुंवर अत्याचार केले, हे तर हिंदीवरच अत्याचार करतायत, अशी टीका केली. तसेच आपल्या गल्लीत, घरात कोणीही सिंह असतो.

तुमच्यात हिंमत असेल तर बिहार, तामिळनाडू, उत्तरप्रदेशात या, तुम्हाला दाखवू. तुम्हाला आपटून आपटून मारू. मराठी लोक कुणाची भाकर खातायत?, आमच्या पैशांवर तुम्ही मराठी जगताय. तुम्ही मराठी किती किती टॅक्स देता? किती लोकांकडे कोणते उद्योग आहेत? आमच्याकडे खाणी आहेत, तुमच्याकडे आहेत का? असे म्हणत डिवचले होते.