Nana Patole : लोकसभेच्या दणदणीत यशानंतर नाना पटोले पुन्हा 'अ‍ॅक्शन मोड'मध्ये, माजी आमदाराचं निलंबन

Nana Patole : लोकसभा निवडणुकीत महायुतीच्या उमेदवार पंकजा मुंडेंना जाहीर पाठींबा देणारे काँग्रेसचे माजी आमदार नारायणराव श्रीमंतराव मुंडे यांना काँग्रेसमधून सहा वर्षांसाठी निलंबित करण्यात आले आहे. महाराष्ट्र प्रदेश काँग्रेस कमिटीचे अध्यक्ष नाना पटोले यांच्या निर्देशाने काँग्रेस पक्षातून सहा वर्षांसाठी निलंबित करण्यात आले आहे. प्रदेश काँग्रेसचे उपाध्यक्ष संघटन व प्रशासन नाना गावंडे यांनी ही माहिती दिली आहे.

लोकसभा निवडणुकीत नारायणराव मुंडे यांनी पंकजा मुंडेंना जाहीर पाठींबा देत शरद पवारांवर जहरी टीका केली होती. तसेच अजित पवार यांच्यावर देखील निशाणा साधला होता.

अंतरवली सराटीमध्ये होणाऱ्या आंदोलनामागे शरद पवार Sharad Pawar असल्याचा आरोप देखील नारायणराव मुंडे यांनी केला होता. उघडपणे त्यांनी पंकजा मुंडे यांना पाठींबा देत मतदान करण्याचे आवाहन केले होते. त्यामुळे त्यांच्यावर कारवाई होण्याची शक्यता वर्तवण्यात येत होती.

नारायणराव मुंडे हे विधानपरिषदेचे माजी आमदार आहेत. लोकसभा निवडणुकीचा प्रचार सुरू असताना त्यांनी बीडमधील महायुतीच्या उमेदवार पंकजा मुंडे यांना पाठींबा दिला. पंकजा मुंडे Pankaja Munde यांच्या विरोधात महाविकास आघाडीने बजरंग सोनवणे यांना उमेदवारी दिली होती.