Manikrao Kokate : कृषी मंत्र्यांना मोठा दिलासा; शिक्षेला स्थगिती, आमदारकीही वाचली

Nashik News : कृषी मंत्री माणिकराव कोकाटे यांना नाशिक जिल्हा व सत्र न्यायालयाने मोठा दिलासा दिला आहे. त्यांच्या दोन वर्षांच्या शिक्षेला स्थगिती देण्यात आली आहे. सदनिका खरेदी फसवणूक प्रकरणात त्यांना प्रथम वर्ग न्यायालयाने दोन वर्षांची शिक्षा सुनावली होती. याविरोधात त्यांनी सत्र न्यायालयात अपिल केले होते. यात 24 फेब्रुवारी रोजी न्यायालयाने त्यांच्या शिक्षेच्या अंमलबजावणीला अंतरिम स्थगिती दिली होती. तसेच त्यांना जामीन मंजूर केला होता.

त्यानंतर याबाबत सविस्तर सुनावणी घेत शिक्षेच्या स्थगितीचा निर्णय राखून ठेवला होता. याबाबत आज (5 मार्च) सुनावणी पार पडली. यात शिक्षेलाही स्थगिती दिली आहे. या स्थगितीमुळे कोकाटे यांच्या आमदारकीला आता कोणताही धोका असणार नाही. तसेच त्यांचे मंत्रिपदही वाचू शकणार आहे. कोकाटे यांच्यासोबतच धनंजय मुंडे यांच्या राजीनाम्यानंतर बॅकफुटवर गेलेल्या राष्ट्रवादीला आणि उपमुख्यमंत्री अजित पवार (Ajit Pawar) यांनाही हा मोठा दिलासा आहे.

कोकाटे यांच्यावर काय होते आरोप?

सिन्नर शहरातील येवलेकर मळा या उच्चभ्रू परिसरातील नागरी कमाल जमीन धारणा कायदा अंतर्गत अतिरिक्त जमिनीवर सदनिका बांधकाम करण्यात आले होते. त्यामध्ये केवळ आर्थिक दुर्बल आणि घर नसलेल्या व्यक्ती अशी पात्रता होती. त्यासाठी कोकाटे बंधूंनी बनावट पुरावे सादर करून आर्थिक दुर्बल असल्याचे शासनाला सांगितले होते.

यामध्ये शासनाची फसवणूक झाल्याची तक्रार तत्कालीन आमदार आणि मंत्री तुकाराम दिघोळे यांनी केली होती. दिघोळे यांनीच या प्रकरणाचा प्रदीर्घ काळ पाठपुरावा केला होता. यादरम्यान, 30 नोव्हेंबर 2019 मध्ये दिघोळे यांचे निधन झाले. पण त्याचा निकाल नुकताच लागला. यात कोकाटे यांना दोन वर्षांची शिक्षा सुनावण्यात आली होती.