Laxman Hake : ओबीसी आंदोलक लक्ष्मण हाकेंच्या निशाण्यावर फडणवीसांचा लाडका आमदार; म्हणाले, ...

Latur News : मस्साजोग येथील सरपंच संतोष देशमुख यांच्या हत्या प्रकरणानंतर त्याचे पडसाद राज्यभर उमटत आहेत. या घटनेनंतर राज्यातील वातावरण चांगलेच तापले आहे. यामुळे सत्ताधारी व विरोधकांकडून एकमेकांवर टीका केली जात आहे. त्यातच ओबीसी समाजाचे नेते लक्ष्मण हाके यांनी लातूर जिल्ह्यातील एका घटनेवरून मुख्यमंत्री देवेंद्र फडणवीस यांचे लाडके आमदार अभिमन्यू पवार यांच्यावर निशाणा साधला आहे.

मस्साजोग येथील सरपंच संतोष देशमुख यांच्या हत्या प्रकरणानंतर आमदार अभिमन्यू पवार यांनी बीड जिल्ह्यातील मोर्चात सहभागी झाले होते. यावेळी त्यांनी भाषणही केले होते. त्यासोबाबतच यावेळी देशमुख कुटुंबाला न्याय मिळवून देण्यासाठी कोपर्डीसारखे मोर्चे काढण्याचा इशारा दिला होता. त्यानंतर मुख्यमंत्री देवेंद्र फडणवीस (Devendra Fadnavis) यांची अभिमन्यू पवार यांनी मंत्रालयात जाऊन भेट घेत बीड येथील मोर्चातील लोकभावना त्यांच्या कानावर घातली होती. त्यासोबतच या प्रकरणाचा फॉलोअप ते पत्रव्यवहार करून घेत आहेत.

दुसरीकडे लातूर जिल्ह्यातल्या टाकळी गावात 18 वर्षीय तरुणाचा प्रेमप्रकरणावरून झालेल्या मारहाणीत खून झाला. या युवकाचा 6 जानेवारीला मृत्यू झाला. हा प्रकार ऑनर किलिंगचा वाटत आहे. त्या कुटुंबाची आमदार पवार यांनी भेट घ्यावयास हवी होती. मात्र, ते अद्याप त्या कुटुंबाच्या भेटीसाठी गेलेले नाहीत. त्यामुळे ते या कुटुंबाला कधी भेटणार? असा सवाल करीत लक्ष्मण हाके यांनी आमदार अभिमन्यू पवारांवर (Abhimanyu Pawar) जोरदार निशाणा साधला. त्यासोबतच बीड येथील सरपंच कुटुंबाच्या भेटीसाठी जाणारे सर्वपक्षीय नेतेमंडळी या ठिकाणी का भेटीसाठी जात नाहीत ? असा सवाल देखील लक्ष्मण हाके यांनी केला.

सामाजिक कार्यकर्त्यांना खालच्या जातीतील लोकांचा मृत्यू दिसतो का नाही ? असा सवाल देखील लक्ष्मण हाके यांनी यावेळी उपस्थित केला. एकंदरीत लक्ष्मण हाके यांनी केलेल्या या टीकेला आमदार अभिमन्यू पवार आता कशा प्रकारे उत्तर देणार याकडे सर्वांचे लक्ष लागून राहिले आहे.