Holiday : खुशखबर! 23 तारखेला मिळणार 'भरपगारी सुट्टी'; या दोन जिल्ह्यांतील नागरिकांची चांदी, नक्की काय आहे कारण?

Holiday news : खुशखबर! २३ एप्रिल रोजी दोन जिल्हांतील नागरिकांना भरपगारी सुट्टी मिळणार आहे. यामागचे कारण म्हणजे त्या दिवशी होणारी विधानसभा पोटनिवडणूक. लोकशाही पद्धतीत प्रत्येक पात्र नागरिकाने मतदान करणे ही महत्त्वाची जबाबदारी मानली जाते. त्यामुळे नोंदणीकृत मतदारांना त्यांचा मतदानाचा हक्क सहजपणे बजावता यावा, यासाठी शासनाकडून विशेष तरतूद करण्यात आली आहे.

लोकप्रतिनिधीत्व कायदा 1951 मधील कलम 135 (ब) नुसार मतदानाच्या दिवशी मतदारांना भरपगारी सुट्टी देणे बंधनकारक आहे.तसेच काही ठिकाणी कामाच्या तासात योग्य ती सवलत देण्यात येते. याच पार्श्वभूमीवर 23 एप्रिल 2026 रोजी राहुरी आणि बारामती या विधानसभा मतदारसंघांमध्ये पोटनिवडणूक होत असल्यामुळे संबंधित मतदारांना ही सुविधा दिली जाणार आहे. या निर्णयामुळे त्या भागातील नागरिकांमध्ये आनंदाचे वातावरण आहे.

या आदेशानुसार, ज्या कामगारांचे नाव मतदान यादीत आहे आणि ते जरी कामानिमित्त दुसऱ्या ठिकाणी कार्यरत असले तरी त्यांना मतदानासाठी सुट्टी देणे आवश्यक राहणार आहे. ही सुट्टी केवळ सरकारी कर्मचाऱ्यांपुरती मर्यादित नसून खाजगी कंपन्या, दुकाने, कारखाने, हॉटेल, माहिती तंत्रज्ञान क्षेत्र, मॉल्स आणि विविध व्यावसायिक आस्थापनांनाही लागू आहे.

काही अत्यावश्यक सेवा किंवा उद्योगांमध्ये पूर्ण दिवस सुट्टी देणे शक्य नसल्यास अशा कर्मचाऱ्यांना 2 ते 3 तासांची विशेष सवलत देणे बंधनकारक करण्यात आले आहे, जेणेकरून ते मतदानाचा हक्क बजावू शकतील. ही जबाबदारी संबंधित संस्थांच्या मालकांवर आणि व्यवस्थापनावर असेल.

जर कोणत्याही आस्थापनाने कर्मचाऱ्यांना सुट्टी किंवा सवलत दिली नाही आणि त्यामुळे त्यांना मतदान करता आले नाही, तर अशा संस्थांविरोधात कठोर कारवाई केली जाऊ शकते. त्यामुळे सर्व संस्थांनी शासनाच्या सूचनांचे काटेकोर पालन करणे आवश्यक आहे.

एकूणच, मतदारांचा सहभाग वाढावा आणि लोकशाही अधिक बळकट व्हावी, यासाठी शासनाने हा महत्त्वाचा निर्णय घेतला आहे.