Gokul Dudh Sangh : मुख्यमंत्र्यांना भेटलेल्या डोंगळेंना ‘गोकुळ’चे 19 संचालक दाखविणार ‘कात्रज’चा घाट; एका रात्रीत फिरली चक्रे!

Kolhapur, 16 May : कोल्हापूर जिल्हा दूध उत्पादक संघ अर्थात ‘गोकुळ’च्या अध्यक्षपदावरून सध्या घमासान सुरू आहे. मुख्यमंत्री आणि उपमुख्यमंत्र्यांनी ‘गोकुळ’च्या राजकारणात पहिल्यांदाच उडी घेतल्यानंतर विद्यमान अध्यक्ष अरुण डोंगळे यांनी राजीनामा देण्यास नकार दिला आहे. त्यामुळे ‘गोकुळ’च्या अध्यक्ष बदलात अधिक चुरस निर्माण झाली आहे. डोंगळे राजीनामा देत नसल्याने काँग्रेस नेते आमदार सतेज पाटील आणि वैद्यकीय शिक्षण मंत्री हसन मुश्रीफ यांना धक्का बसला आहे. मात्र, मुख्यमंत्री आणि उपमुख्यमंत्र्यांना भेटलेल्या डोंगळेच्या मनसुब्यांना सत्ताधारी १९ संचालकांनी कात्रजचा घाट दाखविण्याचे निश्चित झाले आहे. गोकुळ दूध संघाच्या ताराबाई पार्क येथील कार्यालयात सर्वांनी एकत्र येत थेट डोंगळे यांनाच चॅलेंज दिले आहे.

अरुण डोंगळे (Arun Dongle) यांच्या एकमुखी कारभाराला अनेक संचालकांचा विरोध आहे. त्यामध्ये महायुतीच्याही संचालकांचा समावेश आहे. ते संचालकही डोंगळे यांच्या विरोधात असू शकतात. ताराबाई पार्क येथील कार्यालयात एकत्र येत संघाच्या २१ पैकी १९ संचालकांनी डोंगळे यांच्या भूमिकेला सध्या तरी विरोध दर्शवला आहे. या संचालकांनी राज्यातील राजकारण वेगळे आणि जिल्ह्याचे राजकारण वेगळे, हे एकजुटीतून दाखवून दिले आहे.

शिरगाव येथे झालेल्या गोकुळ दूध संघाच्या (Gokul Dudh Sangh) मासिक बैठकीत डोंगळे यांच्यासोबत एकही संचालक नसल्याने लवकरच त्यांचे बंड मोडून पडणार असल्याचे चित्र आहे. त्यासाठी जिल्ह्यातील सर्वच नेत्यांकडून हालचाली सुरू झाल्या आहेत. त्यामुळे डोंगळे हे दोन दिवसांत राजीनामा देतील, यासाठी प्रतीक्षा केली जात आहे.

संचालकांच्या बैठकीकडे रजा अर्ज देवून त्यांनी पाठ फिरवली आहे, त्यामुळे ‘गोकुळ’ची आजची सभा होणार नाही, याचा अंदाज डोंगळे यांनी घेतला आहे. मात्र, सर्व संचालकांनी उपस्थिती लावून डोंगळे यांच्या आशेवर पाणी फेरले आहे. संघातील महायुती आणि महाविकास आघाडीच्या संचालकांनी शाहू आघाडी म्हणून एकत्र येत मोठा धक्का दिला आहे. तर, चेतन नरके आणि बाळासाहेब खाडेही उपस्थित संचालकांसोबत उभे राहिले.

‘गोकुळ’मध्ये महायुती किंवा महाविकास आघाडीची सत्ता नसून शाहू आघाडीची सत्ता आहे. याचे मंत्री हसन मुश्रीफ, मंत्री प्रकाश आबिटकर, आमदार सतेज पाटील, आमदार विनय कोरे, आमदार चंद्रदीप नरके नेतृत्व करतात, असा दाखला माजी अध्यक्ष विश्वास पाटील यांनी दिला.

जिल्ह्यातील सहकारात राजकारण नको, यासाठी जिल्हा बँक, शेतकरी संघ, बाजार समितीसह ‘गोकुळ’मध्येही हे सर्व लोकप्रतिनिधी एकत्र आले आहेत. त्यानुसार गेल्या चार वर्षांपासून सुरळीत चाललेला कारभार वेगळ्या वाटेने चालविण्यासाठी निघालेल्या डोंगळे यांना शाहू आघाडीच्या सर्वच संचालकांनी कडाडून विरोध दर्शविला आहे.

दरम्यान, डोंगळे यांचे बंड मोडून काढण्यासाठी वरिष्ठ नेत्यांमध्ये हालचाली सुरू झाल्या आहेत. यातूनही डोंगळे यांनी राजीनामा न दिल्यास त्यांच्यावर अविश्‍वास ठराव आणण्याच्या हालचालींनी वेग घेतला आहे.