Patan : आदित्य ठाकरे शंभूराज देसाईंवर बरसले... राजीनामा देऊन निवडून येऊन दाखवा...

मल्हारपेठ : पाठीत खंजीर खुपसुन शिवसेना फोडण्याचे पाप आणि माणुसकीसोबत गद्दरी करणाऱ्यांना धडा शिकवण्याची, त्यांची जागा दाखवण्याची वेळ आली आहे. थोडी जरी हिंम्मत असेल तर आमदारकीचा राजीनामा देऊन निवडणूक लढवुन निवडुन येऊन दाखवा, असे थेट आव्हान युवा सेनेचे प्रमुख आदित्य ठाकरे यांनी निष्ठा य़ात्रेदरम्यान माजी मंत्री आमदार शंभूराज देसाई यांना त्यांचे नाव न घेता दिले.

मल्हारपेठ येथील ग्रामपंचायती समोरील प्रांगणात शिवसेनेच्या निष्ठा यात्रेत युवा सेना प्रमुख आदित्य ठाकरे बोलत होते. खासदार विनायक राऊत, माजी आमदार दगडुदादा सपकाळ, शिवसेनेचे सचिव आदेश बांदेकर, सदाशिव सपकाळ, उपनेते नितीन बानुगडे-पाटील, शिवसेना जिल्हा प्रमुख हर्षद कदम, यशवंत घाडगे, उपजिल्हाप्रमुख रविंद्र पाटील, तालुका प्रमुख सुरेश पाटील यांच्यासह शिवसैनिक उपस्थित होते.

उठाव किवा बंड करायला ताकद लागते. मात्र, अडीच वर्षे मजामस्ती करुन स्वार्थापोठी गद्दारी करणारे गुवाहाटीत जाऊन मस्ती करत होते, असा घाणाघाती आरोप करून आदित्य ठाकरे म्हणाले, खरे शिवसैनिक असते तर तेथील पुरपरिस्थितीत जनतेला मदत केली असती. ४० आमदारांनी गुवाहाटीत जाऊन काय तमाशा केला, हे महाराष्ट्रातील जनतेने पाहिले आहे.

ज्या गद्दारांनी कोरोना काळात माजी मुख्यमंत्री उद्धव ठाकरे हॉस्पीटलमध्ये असताना त्यांची काळजी घेण्याऐवजी वेळ साधुन गद्दारी करुन शिवसेना फोडण्याचे कटकारस्थान रचले जात होतो. अशा गद्दारांना वेळीच धडा शिकवण्याची वेळ आली आहे. राज्यात घाणेरडे राजकारण सुरु आहे. गेल्या महिनाभरापासुन दोन मंत्र्यांचे जंम्बॊ मंत्रिमंडळ अस्तित्वात आले असुन तिसरा लायकीचा मिळाला नाही, ही सगळ्यात मोठी शोकांतिका आहे. अडीच वर्षात ४० गद्दारांची सत्तेची भुक वाढुन त्यांनी 'ईडी'ची पिडा मागे लागल्यामुळे शिवसेनेला वेटीस धरले. त्यांना आता माफी नाही, असाही इशारा त्यांनी दिला.

देसाईंच्या बालेकिल्यात मोठी गर्दी

निष्ठा यात्रेसाठी आमदार आदित्य ठाकरे आज दुपारी दोन वाजता येणार होते. त्यामुळे सकाळपासुन कार्यकर्त्यांनी मोठी गर्दी केली होती. मात्र, त्यांचा दौरा अडीच तासाहुन अधिक काळ लांबला. तरीही सभेच्या ठिकाणी असणारी गर्दी तसुभरही कमी झाली नाही. आमदार शंभूराज देसाई यांच्या बंडखोरीनंतर ठाकरेंची झालेली सभेस प्रतिसाद कसा मिळेल का, अशी सर्वांना शंका होती. मात्र, सभेस मोठी गर्दी होती.

घोषणांतुन दिसली युवकांची चीड

निसरेफाटा येथे आमदार आदित्य ठाकरे यांचे आगमन झाले. तेथुन रॅलीने वाद्यांच्या गजरात त्यांची मल्हारपेठपर्यंत जोरदार शक्तीप्रदर्शन करत रॅली काढण्यात आली. यावेळी युवकांनी जोरदार घोषणाबाजी केली. शिवसेनेच्या आमदारांच्या बंडोखोरीनंतर युवकांत निर्माण झालेली चिढ त्यांच्या घोषणांतून दिसुन आली.