Savta Parishad Support to Ajit Pawar : राज्यातील सावता परिषद अजित पवारांच्या पाठीशी; पंढरपुरात जाहीर केला निर्णय

Ajit Pawar News : सावता परिषदेने उपमुख्यमंत्री अजित पवार यांना पाठिंबा जाहीर केला आहे. परिषदेचे अध्यक्ष कल्याण आखाडे यांनी या संदर्भात माहिती दिली आहे. (Ajit Pawar is supported by Savta Parishad in the state)

अजित पवार (Ajit Pawar) यांच्या बंडानंतर राष्ट्रवादी काँग्रेसमध्ये (NCP) दोन‌ गट पडले आहेत. ज्येष्ठ नेते शरद पवार आणि अजित पवार यांच्या नेतृत्वात राष्ट्रवादी काँग्रेस विभागली गेली आहे. दोन्ही गटाकडून आपल्याच पाठीशी संख्याबळ जमविण्याचे प्रयत्न सुरू आहेत. दोन्ही गटाकडून नेतेमंडळी आणि आमदारांना आपल्या गटाकडे खेचण्याचा प्रयत्न सुरू आहे

दरम्यान, उपमुख्यमंत्री अजित पवार हेच राज्याचा विकास करू शकतात, असे सांगत बीड येथील सावता परिषदेचे अध्यक्ष कल्याण आखाडे यांनी राज्यभरातील सावता परिषदेचे हजारो कार्यकर्ते उपमुख्यमंत्री अजितदादांच्या पाठीशी असल्याचे त्यांनी आवर्जून सांगितले.

विठ्ठलाच्या पालखीने आज (गुरुवारी ता. १३ जुलै) अरणकडे संत सावता माळी यांच्या भेटीसाठी प्रस्थान ठेवले. पालखीच्या स्वागतासाठी आखाडे आज पंढरपुरात आले होते. त्यावेळी माध्यमांशी बोलताना त्यांनी आपली व सावता परिषदेची राजकीय भूमिका स्पष्ट केली.

आखाडे यांनी राज्यभरात सावता परिषदेच्या माध्यमातून ओबीसी समाजाचे संघटन केले आहे. सावता परिषदेने‌ पाठिंबा जाहीर केल्याने अजित पवार गटाची ताकद वाढणार आहे. आगामी स्थानिक स्वराज्य संस्थांच्या निवडणुकीत तीच ताकद निर्णायक ठरणार आहे.

दरम्यान, शरद पवार गटाकडून मंत्री छगन भुजबळ यांना जाणूनबुजून टार्गेट केले जात आहे. त्यांना त्रास दिला जात आहे. परंतु राज्यातील सर्व ओबीसी समाज छगन भुजबळ यांच्या पाठीशी खंबीरपणे उभा असल्याचेही आखाडे यांनी स्पष्ट केले.