एकनाथ शिंदेंना अजित पवार म्हणाले, कधी आपल्याला एकत्र यावे लागेल सांगता येत नाही...

Pawar Vs Shinde : महाराष्ट्राच्या विधानसभेचे पावसाळी अधिवेशन सुरू आहे. यात दुसऱ्या दिवशी राज्यातील आपत्ती व्यवस्थापनाच्या विषयावरून विरोधी पक्षनेते अजित पवार ( Ajit Pawar ) यांनी राज्य सरकारवर जोरदार टीका केली. शेतकऱ्यांवर आलेली नैसर्गिक आपत्ती व मंत्रीमंडळाच्या निर्णयावर त्यांनी मुख्यमंत्री एकनाथ शिंदे यांची फिरकी घेतली.

अजित पवार म्हणाले, मुख्यमंत्री साहेब आपल्याला महाराष्ट्राचा दौराही महत्त्वाचा वाटला यात दुमत नाही. मात्र त्या दौऱ्यावर तुम्ही व तुमचे मंत्री जात असताना क्रेनने मोठे हार घालण्याचे काम सुरू होते. तिथे माणसे मरत आहेत. आत्महत्या करत आहेत. आणि तुम्ही काय करत आहात तर सध्याच्या राज्यातील आपत्ती संदर्भात तुम्ही आदेश काढायला हवा होता की, कोणी सत्कार स्वीकारू नका. थोडे शांतपणे घ्या, सरकारने शेतकऱ्यांच्या पाठीशी मजबूतपणे उभे राहण्याचे काम करायचे असते. मात्र तुम्ही तसे केले नाही, असा आरोप त्यांनी केला.

ते पुढे म्हणाले की, आपण एकत्रित मंत्रीमंडळात असताना जी कामे मंजूर केली. त्याला स्थगिती देण्याचे काम बरं नव्हं, असे म्हणत त्यांनी हात जोडले. कधी कुणावर काय प्रसंग येईल सांगता येत नाही. सगळे दिवस सारखे नसतात. कधी आपल्याला एकत्र यावे लागेल सांगता येत नाही. त्यामुळे असे करू नका, अशी कोरपखळी ही त्यांनी मारली.