Ambedkar VS Dhobale : 'मातंग समाजातील किती तरुणांना नोकरी...', लक्ष्मण ढोबळेंवर आंबेडकरांचा प्रहार

विश्वभूषण लिमये

Anandraj Ambedkar News : अनुसूचित जातीमधील वर्गीकरणावरून महाराष्ट्रातील राजकारणात वाद प्रतिवाद होत आहेत. एका टिव्ही शोमध्ये माजी मंत्री लक्ष्मण ढोबळे आणि रिपब्लिकन सेनेचे अध्यक्ष आनंदराज आंबेडकर यांच्यामध्ये वाद झाला. या वादानंतर आनंदराज आंबेडकर यांनी सोलापूरमधील झालेल्या कार्यक्रमात ढोबळेंवर निशाणा साधला.

'तुम्ही जेवढ्या शैक्षणिक संस्था काढल्या त्यामध्ये तुम्ही किती मातंग मुलांना मोफत शिक्षण दिले आहे? समाजाचा किती उद्धार केला आहे आणि स्वतः चा किती उद्धार केला आहे, याचा फक्त जाब मातंग समाजातील तरुणांना द्या.', असे आव्हान आंबेडकर यांनी ढोबळेंना केले.

'मी त्यांच्यावर (ढोबळे) आरोप केले आणि त्यांच्या कुठल्या केसेस काढल्या तर काय परिस्थिती होईल ? मी आंबेडकरी चळवळीतील कार्यकर्ता आहे, कोणाच्या पर्सनल गोष्टींवर जात नाही. स्वतःच्या स्वार्थासाठी इतके वर्ष सत्ता भोगली आणि आत्ता परत दुसऱ्या पक्षात जाऊन त्यांच्या टीमकीवर नाचतायेत, हे अत्यंत दुर्दैवी आहे.', असे देखील ते म्हणाले.

'फक्त त्यांना विचारा नागपूरला त्यांच्याच समाजाच्या लोकांनी त्यांची काय परिस्थिती केली होती. तुम्ही समाजाचे नेतृत्व करण्यासाठी किती सक्षम आहात? आज आमच्या बरोबर मातंग समाजातील अनेक तरुण आंबेडकरी विचाराने प्रभावित होऊन बौद्ध धम्म स्वीकारला आहे.शिक्षण घेऊन व्हाईट कॉलर जॉब करतायेत.अत्यंत चांगल्या पद्धतीने आमचे रोटीबेटी व्यवहार ही होत आहेत.', असे देखील ते म्हणाले.

डाव सफल होऊ देणार नाही...

आंबेडकर म्हणाले, बौद्ध आणि मातंग समाजामध्ये काही लोकं विष कालवू पाहतायेत,पण आंबेडकरी समाज आणि सुशिक्षित मातंग समाज हा त्यांचा उद्देश सफल होऊ देणार नाहीत, अशी मला आशा आहे. दरम्यान, आंबेडकरी चळवळीतला कार्यकर्ता हा सत्तेपासून कायमचा वंचित राहू नये म्हणून रिपब्लिकन सेनेत येण्याचं आवाहन मी करत आहे, असे देखील त्यांनी सांगितले.