Mohite Patil : विजयदादा भाजपत असेपर्यंत त्यांचा लक्ष्मण म्हणून काम करेन : सुभाष पाटलांनी गायले मोहिते पाटलांचे गोडवे

नातेपुते (जि. सोलापूर) : विजयदादा (Mohite Patil) जोपर्यंत भाजपमध्ये आहेत, तोपर्यंत मी त्यांचा लक्ष्मण म्हणून आणि मोहिते पाटील बंधूंचा हनुमान सेवक म्हणून काम करणार आहे. मला कोणत्याही पदाची अपेक्षा नाही. मोहिते-पाटील घराणे भाजपमध्ये (BJP) आहे तोपर्यंत मी त्यांचा सेवक म्हणूनच राहील, अशा शब्दांत एकेकाळचे कट्टर विरोधक सुभाष पाटील (Subhash Patil) यांनी मोहिते पाटलांचे गोडवे गायले. (As long as Vijaydada is in BJP, I will work as his Laxman: Subhash Patil)

माजी उपमुख्यमंत्री विजयसिंह मोहिते पाटील यांच्या विरोधात १९९०, १९९५ आणि १९९९ या तीन विधानसभा निवडणुका लढविणारे सुभाष पाटील यांनी सोमवारी (ता. १२ डिसेंबर) रात्री राजकीय शुत्रत्व संपवत भाजपमध्ये प्रवेश केला. त्यानंतर बोलताना सुभाष पाटील यांनी आपल्या भावना व्यक्त केल्या.

पाटील म्हणाले की, आमच्या समाजाने १९५२ पासून विधानसभेच्या निवडणुका लढवल्या आहेत. मुख्य प्रवाहात नसल्यामुळे आमच्या समाजाची मोठी फरपट होत आहे. विजयदादांचे काम मोठे आहे. माळशिरस तालुक्याच्या पूर्व भागातील १४ गावांना विजयदादांमुळेच उजनीचे पाणी मिळाले आहे. संपूर्ण तालुका सुजलाम सुफलाम झाला आहे. मोहिते-पाटील घराणे भाजपमध्ये आहे; तोपर्यंत मी त्यांचा सेवक म्हणूनच राहील. मला कोणत्याही पदाची अपेक्षा नाही. मात्र, पक्षाने काही जबाबदारी दिली तर त्याचे मी सोने करील.

धैर्यशील मोहिते-पाटील म्हणाले की, ‘सुभाष अण्णा पाटील यांनी कधीही आमचा व्देष केला नाही. दादासाहेब (विजयसिंह मोहिते पाटील) व सुभाष पाटील यांचे राजकारण सुसंस्कृत होते. राजकीय मतभेद होते, मनभेद नव्हते. आगामी काळात त्यांना संपूर्ण मदत करणार.

अध्यक्षीय भाषणात के. के. पाटील म्हणाले की, सुभाष अण्णा पाटील यांनी सर्वसामान्य माणसांना केंद्रबिंदू मानून आयुष्यभर तन-मन-धन अर्पण करून काम केले आहे. त्यांनी कधीही कार्यकर्त्यांच्या खिशाला झळ लागू दिली नाही. आज भाजप राज्यात आणि देशात सत्तेवर असताना अण्णा मात्र आमच्या जवळ नाहीत, याची आम्हाला खंत होती. आज अण्णा भाजपमध्ये आल्यामुळे खऱ्या अर्थाने आनंद होत आहे. विजयदादा आणि सुभाष पाटील हे एकाच मंचावर एकाच पक्षात असल्यामुळे आजचा दिवस अलौकिक आणि अविस्मरणीय आहे.