Ajit Pawar: अजितदादा, तुम्ही काय दिवे लावलेत ? संतप्त संशोधक विद्यार्थ्यांचा सवाल

Kolhapur News: उपमुख्यमंत्री अजित पवार यांनी पीएच.डी धारक विद्यार्थ्यांच्या फेलोशिपच्या विचारलेल्या प्रश्नावर वादग्रस्त वक्तव्य केल्यानंतर राज्यातील पीएच.डी धारक विद्यार्थी आक्रमक झाले आहेत. कोल्हापुरातील शिवाजी विद्यापीठातील विद्यार्थीही उपमुख्यमंत्री अजित पवार यांच्याबद्दल तीव्र नाराजी व्यक्त करताना दिसत आहेत.

राज्याच्या उपमुख्यमंत्र्यांच्या तोंडात असे शब्द शोभत नाहीत, आतापर्यंत ज्या महापुरुषांनी पीएच.डी केली त्यांचा अपमान अजित पवार यांनी केला असून त्यांनी राजीनामा द्यावा, अशा प्रतिक्रिया पीएच.डी धारक विद्यार्थ्यांकडून उमटत आहेत.

आमदार सतेज पाटील (Satej Patil) यांनी मंगळवारी पीएच.डी धारक विद्यार्थ्यांच्या फेलोशिपच्या विचारलेल्या प्रश्नावर उत्तर देताना "पीएच.डी करून काय दिवे लावणार ?", असे धक्कादायक वक्तव्य उपमुख्यमंत्री अजित पवार यांनी केले होते.

या वक्तव्यानंतर राज्यात तीव्र प्रतिक्रिया उमटत होत्या. कोल्हापुरातील शिवाजी विद्यापीठातील पीएच.डी करणाऱ्या विद्यार्थ्यांनी उपमुख्यमंत्री पवार यांच्या बद्दल नाराजी बोलून दाखवली. आज विद्यापीठाच्या मुख्य प्रवेशद्वारासमोर अजित पवार यांच्या विरोधात निदर्शनं करण्यात आली.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

भारतीय विकासाचा मुद्दा हा संशोधनातून समोर येत असतो. संशोधनामुळेच भारताच्या विकासात महत्त्वाचे ठरत आहे. आजपर्यंत अनेक महापुरुषांनी पीएच.डी केली आहे, त्यांच्या संशोधनातूनच भारताची वाटचाल सुरू आहे. अशा थोर पुरुषांचा अपमान उपमुख्यमंत्री अजित पवार यांनी केला आहे. आतापर्यंत तुम्ही दोन ते तीन वेळा उपमुख्यमंत्री झाला. या सर्व काळात तुम्ही काय दिवे लावले, याची महाराष्ट्राला जाण आहे. केलेल्या विधानाबाबत माफी मागावी, अन्यथा राजीनामा द्यावा, अशी मागणी या विद्यार्थ्यांनी केली.

उपमुख्यमंत्री अजित पवार (Ajit Pawar) यांच्या विरोधात तीव्र घोषणाबाजी करण्यात आली. पीएच.डी धारक विद्यार्थ्यांचा अपमान अजित पवार यांनी केला असून कोल्हापूर दौऱ्यात त्यांना आम्ही दाखवून देऊ, शिवाय सरसकट फेलोशिप त्यांनी पीएच.डी धारक विद्यार्थ्यांना द्यावी, अशीही मागणी यावेळी करण्यात आली.

(Edited by- Ganesh Thombare)