Gopichand Padalkar : पडळकरांच्या कॅबिनेट मंत्रिपदासाठी...आटपाडी नगराध्यक्षांचे 20 तासांत 60 किमी पायी चालून विठ्ठलला साकडे

Pandharpur, 08 January : सांगली जिल्ह्यातील आटपाडी नगरपालिका निवडणुकीत विजयी झालेले भाजपचे विशेषतः आमदार गोपीचंद पडळकरांचे कट्टर समर्थक नगराध्यक्ष उत्तम जाधव आणि त्यांच्या सहकाऱ्यांनी तब्बल २० वीस तास आटपाडी ते पंढरपूर असे ६० किलोमीटर पायी चालत पांडुरंगाला साकडे घातले. पडळकर यांना राज्याच्या मंत्रिमंडळात कॅबिनेट मंत्रिपद मिळावे, अशी प्रार्थना आटपाडीच्या नगराध्यक्षांसह पडळकर समर्थकांनी केली आहे.

आमदार गोपीचंद पडळकर (Gopichand Padalkar) हे सर्वसामान्य जनतेचे व वंचित लोकांचे नेतृत्व करतात. अशा नेतृत्वाला राज्यमंत्री मंडळात स्थान मिळावे यासाठी त्यांच्या समर्थकांनी आटपाडी ते पंढरपूर अशी 60 किलोमीटर पायी यात्रा काढली होती. ती पदयात्रा आज सकाळी पंढरपुरात आली. त्यानंतर कार्यकर्त्यांनी चंद्रभागास्नान करुन विठुरायाचे दर्शन घेतले.

गोपीचंंद पडळकर यांच्या समर्थकांनी ‘बा विठ्ठला आमदार गोपीचंद पडळकर यांना राज्याच्या मंत्रिमंडळात संधी मिळू दे,’ असे साकडे घातले. पडळकर यांच्या मंत्रिपदासाठी त्यांच्या समर्थकांनी आटपाडी ते पंढरपूर (Pandharpur) असा ६० किलोमीटरचे अंतर सलग 20 तास चालून पूर्ण केले. ते आज पंढरपुरात आल्यानंतर त्यांचा पंढरपूर भाजपकडून सत्कार करण्यात आला.

आमदार गोपीचंद पडळकर यांना महाराष्ट्राचे मुख्यमंत्री देवेंद्र फडणवीस यांनी त्यांच्या मंत्रिमंडळामध्ये कॅबिनेट मंत्री म्हणून स्थान द्यावे. त्यांचा सन्मान करावा, अशी विठ्ठलाच्या चरणी प्रार्थना केल्याचे नगराध्यक्ष उत्तम जाधव यांनी सांगितले.

या वेळी पंढरपूर तालुका भाजपचे अध्यक्ष प्रा. सुभाष मस्के, किसान मोर्चाचे प्रदेश सचिव माऊली हळणवर यांनी चालत आलेल्या कार्यकर्त्याचे स्वागत केले. या वेळी नगरसेवक अजित जाधव, यशवंत मेटकरी, आनंदराव देशमुख, बाळासाहेब मेटकरी, चंद्रकांत काळे, विक्रांत पुजारी, रोहीत जगताप आदी उपस्थित होते.