Chandrapur municipal election: 'सुधीर कमळ बघ, किशोर कमळ बघ'; वडेट्टीवारांची टोलेबाजी

Chandrapur News : महापालिकेच्या निवडणुकीचा प्रचारात सध्या जोरात सुरू आहे. आरोपांच्या फैरी सर्वत्र सुरू आहेत. सत्ताधारी आणि विरोधक एकमेकांवर आरोप करण्याची एकही संधी सोडताना दिसत नाही. महापालिका निवडणुकीच्या प्रचारात चंद्रपूर जिल्ह्यातील भाजपच्या दोन नेत्यांमध्ये उफाळून आलेल्या गटबाजीवर काँग्रेस विधिमंडळ पक्षाचे नेते विजय वडेट्टीवार यांनी नेमके बोट ठेवले. हा वाद विकोपाला गेल्याने मुख्यमंत्री देवेंद्र फडणीस यांना `सुधीर कमळ बघ, किशोर कमळ बघ', असे सांगावे लागत असल्याचा टोला त्यांनी लागावला.

नगरपालिकेच्या निवडणुकीत काँग्रेसने (Congress) मोठी मुसंडी मारली आहे. संपूर्ण जिल्ह्यात फक्त दोनच नगरपालिकेवर भाजपचा आपले वर्चस्व राखता आहे. वडेट्टीवारांनी आपल्या मतदारसंघातील ब्रम्हपुरी पालिका त्यांनी एक हाती काँग्रेसला जिंकून दिली आहे. त्यामुळे चंद्रपूर जिल्ह्यात काँग्रेसमध्ये चांगलाच उत्साह संचारला आहे. याउलट पराभवातून धडा घेण्यापेक्षा भाजपचे नेते महापालिकेच्या निवडणुकीतही भांडत बसले आहेत.

भाजपचे (BJP) ज्येष्ठ नेते व माजी मंत्री सुधीर मुनगंटीवार आणि आमदार किशोर जोरगेवार यांच्याता तिकीट वाटपावरून मोठा राडा झाला होता. जोरगेवार यांच्या समर्थक असलेल्या जिल्हाध्यक्षाने प्रदेशाध्यक्षांनी दिलेली उमेदवारांची यादीच बदलली होती. त्यामुळे चंद्रपूरच्या जिल्हाध्यक्षांची गच्छंती करण्यात आली आहे. एवढे महाभारत घडल्यानंतरही जोरगेवार यांच्या समर्थकांनी महापालिकेच्या निवडणुकीत बंडाचा झेंडा फडकावला आहे.

निकालानंतर हा वाद आणखीच वाढणार असल्याचे दिसून येते. महापालिकेच्या प्रचारात काँग्रेसच्यावतीने भाजपमध्ये सुरू असलेल्या आपसातील भांडणाकडे सातत्याने लक्ष वेधले जात आहे. पक्षापेक्षा नेते मोठे झाल्याने मुख्यमंत्र्यांना कमळाकडे बघण्याचा सल्ला त्यांना द्यावा लागत असल्याची टीका विजय वडेट्टीवार यांनी केली.

सत्ताधारी भाजप महायुती निवडणुका जिंकण्यासाठी वाट्टेल ते करीत आहे. दहशत माजवण्यासाठी गुंडांना वापरले जात आहे. खुलेआम मारामारी सुरू आहे. पैसे वाटप केले जात आहे. आता तुरुंगातील गुन्हेगारांनापण बाहेर काढून त्यांची मदत सत्ताधाऱ्यांनी घ्यावी, अशी टोलेबाजी वडेट्टीवार यांनी केली.