Baliram Sathe : मोहिते पाटलांवर हल्लाबोल केलेल्या बळीराम साठेंची पाऊले शिंदेसेनेच्या दिशेने; बैठकीनंतर राजू खरेंनी घेतली भेट

Solapur, 15 June : जिल्हाध्यक्षपदावरून अपमानास्पद पद्धतीने हटविण्यात आल्याने दुखावलेल्या बळीराम काका साठे यांनी राष्ट्रवादी काँग्रेस शरदचंद्र पवार पक्ष सोडण्याचा विचार बोलून दाखवल्याची माहिती समर्थकांनी दिली. खासदार धैर्यशील मोहिते पाटील यांच्यावर टीका करत साठे यांनी हा निर्णय घेतला. समर्थकांनी साठेंना अजित पवारांच्या राष्ट्रवादी किंवा शिंदेसेनेत जाण्याचा निर्णय घ्यावा, आम्ही तुमच्यासोबत आहेत, असा शब्द दिला. या बैठकीनंतर आमदार राजू खरे हे साठे यांना भेटायला आले. त्यांची काका साठे आणि त्यांच्या निकटवर्तीयांसोबत अर्धा तास चर्चा झाली, त्यामुळे साठे यांची पाऊले शिंदेसेनेच्या दिशेने तरी पडत नाहीत ना, अशी चर्चा रंगली आहे.

बळीराम साठे (Baliram Sathe) यांना राष्ट्रवादी काँग्रेस शरदचंद्र पवार पक्षाच्या जिल्हाध्यक्षपदावरून हटवून त्यांच्या जागी मोहिते पाटील समर्थक जिल्हा परिषदेचे माजी सदस्य वसंतराव देशमुख यांची वर्णी लावण्यात आली आहे. बळीराम साठे यांना विचारात न घेता त्यांना पदावरून हटविण्यात आले, त्यामुळे साठे यांच्यासह समर्थकांकडून तीव्र नाराजी व्यक्त करण्यात येत होती.

उत्तर सोलापूर तालुक्यातील वडाळा येथे आज (ता. १५ जून) बळीराम साठे यांच्या उपस्थितीत समर्थकांची बैठक झाली. त्या बैठकीत काका साठे यांनी राष्ट्रवादी काँग्रेस शरदचंद्र पवार पक्ष सोडावा. त्यांनी अजित पवारांच्या राष्ट्रवादीत किंवा शिंदेसेना (Shinde Sena) यापैकी कोणत्याही पक्षात जाण्याचा निर्णय घ्यावा, आम्ही तुमच्यासोबत आहोत, अशी भूमिका मांडली.

खुद्द काका साठे यांनी खासदार धैर्यशील मोहिते पाटील यांच्यावर सडकून टीका केली. विधानसभा निवडणुकीत मोहोळ मतदारसंघातून सिद्धी कदम हिची उमेदवारी रद्द करून राजू खरे यांना एबी फार्म दिल्याचा मोहिते पाटलांना राग होता, असेही साठे यांनी सांगितले. त्या वेळी प्रदेशाध्यक्ष जयंत पाटील, धैर्यशील मोहिते पाटील यांच्यात बेबनाव झाला होता. तेव्हापासून साठे यांना पदावरून हटविण्याबाबत प्रयत्न सुरू होते.

दरम्यान, खासदार मोहिते पाटील आणि जयंत पाटील यांच्याबाबत आपण ज्येष्ठ नेते शरद पवार यांच्याकडे तक्रार करणार आहे. मला सांगितले असते तर मी आनंदाने पदावरून दूर झालो असतो, असेही बळीराम साठे यांनी सांगितले.

राजू खरेंनी घेतली वडाळ्यात जाऊन भेट

साठे समर्थकांच्या बैठकीनंतर त्या ठिकाणी आमदार राजू खरे दाखल झाले. खरे हे शरद पवार यांच्या राष्ट्रवादीकडून निवडून आले असले तरी ते पक्षापेक्षा शिंदेसेनेच्या नेत्यांसोबत जास्त वावर असल्याचे दिसून येत आहे. राजू खरे, काका साठे आणि मोजक्या पदाधिकाऱ्यांचा उपस्थितीत अर्धा तास चर्चा झाली. त्यातील चर्चेचा तपशील मिळू शकला नाही. पण, ‘जिथे काका तिथे मी आणि मी तिथे काका’, अशी प्रतिक्रिया आमदार राजू खरे यांनी या बैठकीनंतर दिली आहे.

शिंदे सेनेचे नेते तातडीने वडाळ्यात दाखल

समर्थकांच्या भेटीनंतर उपमुख्यमंत्री एकनाथ शिंदे यांचे नेतृत्व मानणारे आमदार राजू खरे यांनी बळीराम काका साठे यांची भेट घेतली. त्यानंतर शिवसेनेचे जिल्हाप्रमुख अमोलबापू शिंदे, माजी मंत्री सिद्धाराम म्हेत्रे, सोलापूर लोकसभेचे संपर्कप्रमुख महेश साठे यांनी वडाळ्यात जाऊन साठे यांची भेट घेतली, त्यांना शिवसेना प्रवेशाचे निमंत्रण देण्यात आले आहे. आता काका साठे कोणता निर्णय घेणार, याकडे सर्वांचे लक्ष लागले आहे.