Assembly Election 2024 : भाजपच्या बड्या नेत्याच्या मुलानं अन् मुलीनं 'तुतारी'कडून उमेदवारीसाठी लावली 'फिल्डींग'

माजी मंत्री, लक्ष्मण ढोबळे हे राष्ट्रवादीतून भाजपवासी झाले आहेत. मात्र, ढोबळे यांची कन्या आणि पुत्राचा ओढा पुन्हा शरद पवार यांच्या राष्ट्रवादीकडे असल्याचं दिसून आलं आहे. ढोबळे यांचे पुत्र अभिजित आणि कन्या कोमल ढोबळे-साळुंखे यांनी 'तुतारी'कडून उमेदवारीसाठी मुलाखती दिल्या आहेत. त्यामुळे भाजपला सोलापूर जिल्ह्यात '440 व्होल्ट'चा झटका बसण्याची शक्यता आहे.

राष्ट्रवादी काँग्रसचे अध्यक्ष शरद पवार ( Sharad Pawar ) यांच्या सहकार्यानं लक्ष्मण ढोबळे यांनी राजकारणात मोठी मजल मारली. त्यांनी आपल्या लाघवी वाणीनं संपूर्ण महाराष्ट्राला मोहिनी घातली. 2004 पर्यंत लक्ष्मण ढोबळे मंगळवेढ्याचे आमदार होते. परंतु, 2004 ते 2009 या काळात विश्रांती घेत 2009 पासून पुन्हा मोहोळमधून राष्ट्रवादीचे आमदार होण्याची किमया ढोबळे यांना शरद पवार यांच्यामुळे साधला आली होती. मात्र, 2014 मध्ये डावलल्यानंतर ढोबळे यांनी राष्ट्रवादीशी फारकत घेत अपक्ष लढण्याची भूमिका घेतली, त्यात त्यांचा पराभव झाला.

पराभवानंतर ढोबळे ( Laxman Dhobale ) यांनी भाजपशी जवळीक साधली. काही दिवस भाजपत काम केल्यानंतर ढोबळे यांच्या गळ्यात प्रवक्तेपदाची माळ पडली. सध्यातरी लक्ष्मण ढोबळे हे एकनिष्ठपणे भाजपचे काम करत आहेत. मात्र, ढोबळे यांचे पुत्र अभिजित यांनी मोहोळ तर कन्या कोमल यांनी माळशिरस मतदारसंघासाठी शरद पवार यांच्या राष्ट्रवादीतून तिकीट मिळण्यासाठी मुलाखत दिली आहे.

अभिजित ढोबळे हे शाहू सूतगिरणीचे अध्यक्ष आहेत. त्यासह अभिजित यांच्याकडे भाजपच्या पंचायतराज आणि ग्रामविकास विभागाचे मोहोळ विधानसभा मतदारसंघाचे संयोजकपद आहे. तर, लक्ष्मण ढोबळे यांनी स्थापन केलेल्या बहुजन रयत परिषद संघटनेची जबाबदारी कन्या कोमल ढोबळे-साळुंखे यांच्यावर सोपावली असून त्यामाध्यमातून त्या सामाजिक कार्य करतात.

सोलापूर जिल्ह्यात महाविकास आघाडीचे दोन खासदार निवडून आले आहेत. मात्र, विधानसभेसठी शरद पवार यांच्या राष्ट्रवादीकडे इच्छुकांची भाऊक गर्दी झाली आहे. यातच भाजपत असलेल्या लक्ष्मण ढोबळे यांच्या पुत्रानं आणि कन्येनं 'तुतारी'च्या तिकीटासाठी मुलाखत दिल्यानं राजकीय वर्तुळात चर्चांना उधाण आलं आहे.