Solapur News : सोलापूर जिल्ह्यातील अनगर नगरपंचायत नगराध्यक्षपदाची निवडणूक यंदा आरोप-प्रत्यारोपांनी चांगलीच वादळी ठरली होती. गेल्या 40 वर्षांची बिनविरोधची परंपरा मोडीत काढत यावेळी मोहोळचे माजी आमदार राजन पाटलांचा बालेकिल्ल्यातच आव्हान दिले गेल्यानं अनगरमध्ये राजकीय तणाव निर्माण झाला. चक्क अनगरमध्ये निवडणूक लागल्यानं संपूर्ण राज्याचं लक्ष या नगरपंचायतीकडे लागलं होतं. पण राजन पाटलांनी आपला 'होल्ड' दाखवून देत अनगरमधला बिनविरोधचा शिक्का पुसू दिला नाही. या विजयानंतर थेट उपमुख्यमंत्री अजित पवारांनाच आव्हान दिलेल्या राजन पाटील अन् त्यांचे थोरले चिरंजीव विक्रांत उर्फ बाळराजे यांचं थेट भाजप आमदारानं तोंडभरुन कौतुक केलं.
रयत क्रांती मोर्चाचे अध्यक्ष आणि भाजप पुरस्कृत विधान परिषदेचे आमदार सदाभाऊ खोत (Sadabhau Khot) हे शुक्रवारी (ता.28) मोहोळ येथे प्रचारसभेत बोलत होते. त्यांनी आपल्या भाषणात राजन पाटलांना विस्थापित नेते असा उल्लेख केला. तसेच राजन पाटलांसमोरच 'तुमच्या मुलानं कुणाला तरी चॅलेंज दिलं, याचं मला बरं वाटलं, त्यामुळे आले अंगावर तर घ्यायचं शिंगावर' असं वक्तव्य केलं.
खोत म्हणाले, निवडणुकीमध्ये ज्यावेळेस विजय मिळतो, त्यावेळेस प्रतिस्पर्धी हा जिंकलेला असतो. जिंकलेला योद्धा हा त्यावेळी आनंदाने गर्जत असतो. सगळ्यांचा नाद करा, पण आमचा करू नका, हे म्हणायला का कुणाची परमिशन काढावे लागते का? असा सवालही खोत यांनी सभेत बोलताना केला. त्यामुळे मला वाटतं तो आनंदोत्सव असतो आणि तो सगळेच साजरा करतात. याचा कुणाला का राग यावा? असा टोलाही त्यांनी अजितदादांना लगावला.
सदाभाऊ खोतांनी आपल्या भाषणातून करत एकप्रकारे बाळराजेंनी (Balraje Patil) अजित पवारांना दिलेल्या चॅलेंजचं कौतुकच केलं. पण भाषणाच्या ओघात झालेल्या बोलून गेल्यानंतर थोड्याच वेळात पुन्हा माध्यमांशी संवाद साधताना त्यांनी त्या विधानावरुनही सारवासारवही केली. 'मी फक्त अनगरकरांचा नाद करायचा नाही एवढंच ऐकलं, अजितदादांचं नाव ऐकलं नाही' असं म्हणत सदाभाऊ खोतांनी नंतर एक पाऊल मागं घेतल्याचं पाहायला मिळालं.
बाळराजे पाटील यांच्यावर बोलताना सदाभाऊ खोत म्हणाले, "विजयाची पहिली सलामी ही अनगरने दिली. तुमचा स्वभाव लढण्याचा आहे. तुमच्या मुलानं कुणाला तरी चॅलेंज दिलं याचं मला बरं वाटलं, त्यामुळे आले अंगावर तर घ्यायचं शिंगावर. तुमच्या मुलाचं अभिनंदन करतो, कारण माझं पण आयुष्य वाऱ्यावर दगड मारण्यात गेले. मला जोडीदार मिळाला. म्यानातून तलवार काढल्यावर त्याला रक्त काढल्याशिवाय ती म्यानात जात नाही,असंही खोत यांनी सांगितलं.
बाळराजे पाटलांच्या रुपात आपल्याला एक जोडीदार मिळाल्याचंही आमदार सदाभाऊ खोत यांनी यावेळी म्हटलं. विजयाची पहिली सलामी अनगरने दिली, असं सांगत त्यांनी राजन पाटलांचे अभिनंदन केलं. आमचा संघर्ष हा वाडा विरुद्ध गावगाडा आहे. त्यामुळे वाड्याच्या विरोधात कुणीतरी बोललं याचा आनंद झाला असं म्हणत सदाभाऊ खोतांनी अजित पवारांवर निशाणा साधला.
सदाभाऊ खोत म्हणाले, राजन पाटील यांचा मुलगा आमच्या खांद्याला खांदा लावण्यासाठी आला, याचा मला आनंद झाला. राज्यात विस्थापितांची गुढी उभारली पाहिजे. गेली अनेक वर्षे विस्थापित हे प्रस्थापितांच्या विरोधात लढत होते, प्रस्थापित नुसते गुलाल उधळत होते आणि विस्थापित बांधावरून बघत होते. आता पहिल्यांदा प्रस्थापितांना धक्का बसला तर कशाला वाईट वाटून घ्यावं? आम्ही पण सोसलं आहे तसं त्यांनी पण सोसून घ्यावं. ही लढाई विस्थापितांची आहे, असं खोत यांनी ठणकावून सांगत एकप्रकारे अजित पवारांनाच लक्ष्य केलं.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.