Sadabhau Khot : 'गोपीचंद पडळकर मंत्री होणार पण आमची अवस्था बँडवाल्यासारखी...', सदाभाऊ खोतांनी मनातली खंत बोलून दाखवली

Sadabhau Khot News : आमदार गोपीचंद पडळकर यांचा सांगलीतील विट्यामध्ये जाहीर नागरी सत्कार करण्यात आला. या सत्कार समारंभ प्रसंगी विधान परिषदेमधील आमदार सदाभाऊ खोत यांनी पडळकारांचे कौतुक केले. ते म्हणाले, गोपीचंद पडळकर हा दोस्तीला चांगला माणूस आहे. पण त्याला माणसं ओळखता येत नाही. पटकन विश्वास ठेवतो.

पुढे बोलताना सदाभाऊ खोत म्हणाले, गोपीचंद पडळकर हा निश्चितपणे मंत्री होईल. मुख्यमंत्री देवेंद्र फडणवीस त्यांना नक्की मंत्री करतील. पृथ्वीराज देशमुख आमदार-खासदार होतील. मात्र, आम्हाला राज्यपाल तरी करा अन्यथा आमची अवस्था बँडवाल्यासारखी होईल.

'लग्नात बँडवाला गाणी वाजवत असतो. लोक लोक म्हणतात वन्स मोअर मग ते पण जोरात वाजवतं. वन्स मोअर म्हणाणारे पहिल्या पंगतीला आणि वाजवणार बिड्या फुकत कोपऱ्यात त्याला कोण जेव म्हणत नाही. मी म्हणतोय पडळकर मंत्री होणार, बाबा आमदार होणार पण मागून हे म्हणत नाही की तुम्ही बी राज्यपाल होणार', असे सदाभाऊ खोत म्हणाले. खोत यांच्या या वक्तव्यानंतर उपस्थितांमध्ये एकच हशा पिकला.

दुष्काळभागाला खानापूर आटपाडीला पाणी मिळालं पाहिजे, यासाठी कोणी संघर्ष केला असेल तर त्याच नाव गोपीचंद पडळकर आहे. योद्धा रणांगणात हारत नसेल तर त्याला बदनामा करण्याचे षडयंत्र राज्यात केलं गेलं जात.गोपीचंद पडळकर हे विस्थापितांचे आवाज आहेत, असे देखील सदाभाऊ खोत यांनी म्हटले.

सांगली ते भारत फक्त भाजप

गोपीचंद पडळकर म्हणाले, यापुढे देशाला आणि सांगलीला भाजपशिवाय पर्याय उरलेला नाही. येणाऱ्या जिल्हा परिषदेच्या निवडणुका भाजप ताकदीने लढणार आणि जिल्हा परिषदेवर भाजपचा झेंडा रोवणा. खानापूर-आटपाडीच्या विकासाला प्राधान्य देणार.