Solapur Congress : काँग्रेसचे विमानसेवेबाबत पालकमंत्र्यांच्या विरोधात आंदोलन; मात्र खासदार प्रणिती शिंदेंची अनुपस्थिती!

Solapur, 26 May : सोलापूर शहरातील होटगी रोड विमानतळावरून लवकर विमानसेवा सुरू होईल, असे सांगणारे सत्ताधारी भाजपचे नेते दोन वर्षांनंतरही होटगी रोड विमानतळावरून विमानसेवा सुरू करू शकलेले नाहीत. पालकमंत्री जयकुमार गोरे यांनी २६ मे रोजी सोलापूर-गोवा विमानसेवा सुरू होईल, असे सांगितले होते. मात्र, होटगी रोड विमातळावरून दोन वर्षांत अद्याप एकही प्रवासी विमान उडू शकलेले नाही. त्याच्या निषेधार्थ आज काँग्रेसने विमानतळाच्या गेटसमोर आंदोलन केले. मात्र, खुद्द खासदार प्रणिती शिंदे ह्याच आंदोलनाला अनुपस्थित होत्या, तसेच, गर्दी जमविण्यासाठी नेत्यांना धावपळ करावी लागली.

होटगी रोड विमानतळावरून विमानसेवा (Air Services) सुरू होण्यासाठी सुमारे दोन वर्षांपूर्वी सिद्धेश्वर साखर कारखान्याची चिमणी पाडण्यात आली. त्या वेळी भाजपचे (BJP) शहातील नेते अवघ्या काही दिवसांत होटगी रोड विमानतळावरून विमान उडेल, असे छातीठोकपणे सांगत होते. मात्र, होटगी रोड विमानतळावरून ते अद्याप विमानाचे टेक ऑफ करू शकलेले नाहीत. मात्र, त्यामुळे भाजप नेत्यांचे पितळ उघडे पडले आहे.

भाजपच्या स्थानिक नेत्यांकडून तसेच प्रशासनाकडून विमानसेवेबाबत कायम तारीख देण्यात आलेली आहे. मात्र, विमानसेवा सुरू करण्यासाठी त्यांना अद्याप मुहूर्त मिळालेला नाही. त्याच्या विरोधात काँग्रेस पक्षाकडून (Congress) वेळोवेळी आंदोलने करून त्यातील फोलपणा उघड करण्यात आला आहे. दुसरीकडे, सत्ताधारी भाजप मात्र घोषणाबाजी करण्यात धन्यता मानत असल्याचे दिसून येत आहे.

पालकमंत्री जयकुमार गोरे यांनी सांगूनही २६ मे रोजी सोलापुरातून विमान उडू शकलेले नाही. त्यामुळे आज काँग्रेस पक्षाकडून आंदोलन करून गोरे यांचा निषेध करण्यात आला. सोलापूरहून विमानसेवा सुरू होण्याबाबत अद्याप कोणत्याही हालचाली शासकीय पातळीवरून होताना दिसत नाहीत, त्यामुळे पालकमंत्र्यांनी सोलापूकरांना खोटी आश्वासने दिल्याचा आरोप काँग्रेस पक्षाकडून करण्यात आला.

सोलापूरच्या विमानसेवेच्या तारखा म्हणजे सांग सांग भोलेनाथासारखी परिस्थिती झाली आहे. सत्ताधारी भाजपकडून विमानसेवेचे केवळ गाजर दाखविले जात आहे. त्याचा निषेध म्हणून होटगी रोड विमानतळासमोर काँग्रेस पक्षाकडून आंदोलन करण्यात आले.

या आंदोलनासाठी शहराध्यक्ष चेतन नरोटे, सेवा दलाचे अध्यक्ष भीमाशंकर टेकाळे, प्रमिला तुपलवंडे, विनोद भोसले, गणेश डोंगरे यांच्यासह कार्यकर्ते उपस्थित होते. मात्र, सोलापूरकरांचा जिव्हाळ्याच्या विमानसेवेचा विषय असतानाही या आंदोलनात खासदार प्रणिती शिंदे या सहभागी झाल्या नाहीत.