Guardian Minister : 'योग्य वेळी योग्य ठिकाणी...'; पालकमंत्रीपदाच्या नियुक्तीवर नाराज मंत्री मुश्रीफांचा इशारा

Mumbai News : उपमुख्यमंत्री अजित पवार यांच्या राष्ट्रवादी काँग्रेसमधील मंत्र्यांनी पालकमंत्रीपदाच्या नियुक्तीवर जाहीरपणे नाराजी व्यक्त करू लागले आहेत. मंत्री नरहरी झिरवळ यांना हिंगोली जिल्ह्याचे पालकमंत्रीपदी नियुक्त केली आहे. त्यांनी गरिब जिल्हा दिला, असे म्हणत वरिष्ठांना जाब विचारणार आहे, असे म्हटले.

आता मंत्री झिरवळ यांच्यापाठोपाठ आता मंत्री हसन मुश्रीफ यांनी देखील वाशिम जिल्ह्याच्या पालकमंत्रीपदाच्या नियुक्तीवरून नाराजी व्यक्त केली आहे.

मंत्री हसन मुश्रीफ (Hasan Mushrif) कोल्हापूरऐवजी वाशिम जिल्ह्याच्या पालकमंत्रीपदावर नियुक्ती मिळाली आहे. कोल्हापूरपासून वाशिम जिल्हा तब्बल 623 किलोमीटर अंतरावर आहे. मंत्री मुश्रीफ ध्वजवंदनाच्या कार्यक्रमाला वाशिम जिल्ह्यात अदल्या दिवशी म्हणजेच, 25 जानेवारीला पोचले होते. त्यावेळी त्यांनी या नियुक्तीवर काहीशी नाराजी व्यक्त केली.

पालकमंत्रीपदाच्या नियुक्तीवर नाराजी व्यक्त करताना मंत्री मुश्रीफ म्हणाले, "मी यावर योग्य वेळी योग्य ठिकाणी व्यक्त होणार आहे. अजित पवार (Ajit Pawar) यांच्याशी याविषयी चर्चा केली असून, श्रद्धा आणि सबुरी ठेवण्याचा निर्णय घेतला आहे". मात्र वाशिम जिल्हाला लागलेला झेंडा-टू-झेंडा पालकमंत्री हा डाग पुसू आणि जिल्ह्याच्या विकासाला नवी दिशा दिली जाईल, असेही आश्वासन पुढे दिले.

मंत्री हसन मुश्रीफ यांनी वाशिम जिल्ह्याबाबत चिंता व्यक्त केली. जिल्हा लहान असला, तरी शेतीप्रधान आहे. जिल्ह्याला विकासाची गती देण्यासाठी अधिक गतीने काम गरजेचे आहे, असेही ते म्हणाले. वाशिम जिल्ह्यातील ध्वजवंदनाचा कार्यक्रम होताच, मंत्री हसन मुश्रीफ हे तात्काळ कोल्हापूरकडे रवाना झाले. त्यांच्या दौऱ्यात कोणत्याही प्रशासकीय बैठकांचा समावेश नव्हता. त्यामुळे मंत्री मुश्रीफ पालकमंत्रीपदाच्या नियुक्तीवर नाराज असल्याचे स्पष्ट दिसले.

पवारांच्या प्रकृतीविषयी चिंता...

दरम्यान, शरद पवार यांच्या तब्येतीविषयी मंत्री मुश्रीफ यांनी चिंता व्यक्त केली. शरद पवार यांना कफ आणि आवाज बसल्यामुळे अशक्तपणा जाणवत आहे, असे त्यांनी सांगितले.