Mohite Patil Family : धैर्यशील मोहिते पाटलांचे निर्णय त्यांच्या कुटुंबातील लोक फिरवतात, टिकू देत नाहीत : उत्तम जानकरांचा गौप्यस्फोट

Solapur, 12 June : मोहिते पाटील कुटुंबात निर्णय कोण करतंय, हेच समजत नाही. त्यांच्या कुटुंबात अनेक सत्ताकेंद्रे आहेत. खासदार धैर्यशील मोहिते पाटील पुढे होऊन निर्णय घेतात. पण, त्यांचा निर्णय फिरविणारी त्यांच्याच कुटुंबात यंत्रणा आहे. त्यांचे निर्णय कुटुंबातील लोक टिकू देत नाहीत, असा गौप्यस्फोट माळशिरसचे राष्ट्रवादी काँग्रेस शरदचंद्र पवार पक्षाचे आमदार उत्तम जानकर यांनी केला.

आमदार उत्तम जानकर यांनी विधान परिषद निवडणुकीत महायुतीचे उमेदवार राजेंद्र राऊत यांना पाठिंबा देण्याचा निर्णय घेतला आहे. त्यानंतर त्यांनी मोहिते पाटील यांच्या कुटुंबावर शरसंधान करत अनेक गोष्ट उजेडात आणल्या आहेत.

ते म्हणाले, मोहिते पाटील कुटुंबात कोण निर्णय करतंय, हेच समजत नाही. खासदार धैर्यशील मोहिते पाटील पुढे होऊन निर्णय घेतात. पण, त्यांचा निर्णय फिरविणारी मागं यंत्रणा आहे. राजकारण करताना प्रत्येक ठिकाणी न्याय द्यावा लागतो. निवडणुकीची व्यूहरचना करावी लागते, आघाड्या कराव्या लागतात, हे सर्व आपण ठरवलं तर पाठीमागं पुन्हा वेगळ्याच घडामोडी होतात. प्रत्येक वेळी ठरवलेला प्लॅन, व्यूहरचना ही उद्‌ध्वस्त केली जाते.

मोहिते पाटील कुटुंबात एकत्रितपणाच्या निर्णयाचा अभाव झालेला आहे. निर्णय करणारी अनेक केंद्रे त्यांच्या कुटुंबात आहेत, त्यामुळे निर्णय होत नाहीत आणि केलेला निर्णय पुन्हा बदलला जातो, असे वारंवार घडत असल्यामुळे राजकीय नुकसान होत आहे, असे उत्तम जानकर यांनी नमूद केले.

ते म्हणाले, मोहिते पाटील कुटुंबात अनेक सत्ताकेंद्रे आहेत. खासदार धैर्यशील मोहिते पाटील यांचे निर्णय बऱ्याच वेळा रास्त असतात. पण त्यांचे कुठलेच निर्णय ठेवले जात नाहीत, बिघडवले जातात. फिरवले जातात. हे सातत्याने घडत आहे, त्यामुळेच राजकारणात नुकसान होऊ लागले आहे. सगळ्या आमदारांनी वेगवेगळ्या भूमिका घेतल्या आहेत.

लोकसभा निवडणुकीच्या वेळी मी दिलेला शब्द पाळण्यासाठी जीवावर उदार होऊन विमानातून उडी टाकून आलो होतो, तरीसुद्धा मी आमदार होऊ नये; म्हणून त्यांच्या कुटुंबातील लोकांनी जर मुख्यमंत्री देवेंद्र फडणवीस यांच्याकडे जाऊन माझा जातीचा दाखला रद्द करा, अशा पद्धतीची मानसिकता असेल तर ते चुकीचे आहे, असेही आमदार उत्तम जानकर यांनी नमूद केले.