अल्टिमेटमची भाषा करू नये, हे कायद्याने चालणारे राज्य...शंभूराज देसाई

मुंबई : महाराष्ट्रात कोणी अल्टिमेटम देण्याची भाषा करू नये. हे राज्य कायद्याने चालणारे असून कायद्याचे पालन सगळ्यांनी केले पाहिजे. राज्यातील कायदा-सुव्यवस्था बिघडणार असेल तर पोलिस निश्चितपणे त्यांच्यावर कठोर कारवाई करतील, असा सूचक इशारा राज्याचे गृहराज्यमंत्री शंभूराज देसाई यांनी दिला आहे.

मनसे प्रमुख राज ठाकरे यांच्यावर संभाजीनगर येथील सभेनंतर आज गुन्हा दाखल करण्यात आला आहे. याबाबत गृहराज्यमंत्री शंभूराज देसाई यांना विचारले असता त्यांनी अल्टीमेटम वगैरे असा कोणी देण्याची भाषा महाराष्ट्रामध्ये करू नये. हे राज्य कायद्याने चालणारे असून कायद्याचे पालन सगळ्यांनी केले पाहिजे, असा इशारा त्यांनी यावेळी दिला.

मंत्री देसाई म्हणाले, ''संभाजीनगरच्या झालेल्या सभेनंतर पोलिस आयुक्तांनी सविस्तर तपास केल्यानंतर पोलिसांनी ही कारवाई केली असेल. त्यांनी त्यामुळे केलेली कारवाई ही नियमाला धरून व अटींचा भंग झाला म्हणूनच केलेले आहे. ज्यांचा ज्यांचा या सभेत सहभाग होता, ज्यांनी ज्यांनी त्या सभेमध्ये याठिकाणी भाग घेतलेला आहे, अशा काही लोकांना कदाचित नोटीस दिल्या गेल्याची शक्यता आहे.''

मला त्याची सविस्तर माहिती प्राप्त नाही, परंतु ज्याने कोणी अटींचे उल्लंघन केला असेल त्यांच्यावर कारवाई झालेली आहे. ''अल्टीमेटम वगैरे असा कोणी देण्याची भाषा महाराष्ट्रात करू नये, हे राज्य कायद्याने चालणारे असून कायद्याचे पालन आणि सगळ्यांनी केले पाहिजे. त्यामुळे विशेषता सर्वसामान्य जनतेला कायदा हातात घेण्याची या कृतीमुळे त्रास होणार असेल कायदा-सुव्यवस्था राज्यातली बिघडणार असेल तर पोलिस निश्चितपणे त्यांच्यावर कठोर कारवाई करतील.'' सध्या राज्यात कोणतीही परिस्थिती उद्भवली तर आमचे पोलिस प्रभावीपणे हाताळण्यासाठी सदैव तयार आहेत. आत्तासुद्धा कुठल्याही परिस्थितीला सामोरे जाण्याची तयारीत आमच्या पोलिसात आहे.