Sanjay Ghatge News: महायुतीकडून धमक्या आल्या; भाजपमध्ये प्रवेश केलेल्या माजी आमदार घाटगेंचा मोठा गौप्यस्फोट

Kolhapur News : लोकसभा निवडणुकीवेळी मला राज्यातल्या महायुतीच्या काही वरिष्ठ नेत्यांनी धमक्या दिल्या. कारखान्यासाठी एमएससी आणि केडीसी बँकेकडून दिलेले कर्ज थांबवण्याची धमकी दिली. मात्र, तरी देखील मी छत्रपती घराण्याच्या आदरापोटी शाहू छत्रपती यांना पाठिंबा दिला, असा गौप्यस्फोट नुकताच भाजपमध्ये प्रवेश केलेले माजी आमदार संजय घाटगे (Sanjay Ghatge) त्यांनी पत्रकार परिषदेत केला. ते कोल्हापुरात बोलत होते.

पंतप्रधान नरेंद्र मोदी आणि मुख्यमंत्री देवेंद्र फडणवीस यांच्या नेतृत्वात देशांची घोडदौड सुरू आहे. त्याला प्रभावित होऊन मी भाजपमध्ये (BJP) जाण्याचा निर्णय घेतला आहे. मी कोणाकडे कोणत्याही पदाची मागणी केलेली नाही. पद द्या म्हणून मी कोणाच्या दरात जाणारा नेता नाही. त्यामुळे वैयक्तिक स्वार्थासाठी मी भाजप मध्ये जाण्याचा प्रश्नच येत नाही. अशा शब्दात भाजपमध्ये प्रवेश केल्यानंतर संजय घाटगे यांनी प्रतिक्रिया दिली आहे.

शक्तिपीठ महामार्गाला माझा विरोधच आहे. हा विरोध मी पक्षप्रवेश करतानाच वरिष्ठांना कळविलेला आहे. मुंबईवरून मी पहाटे कोल्हापूरमध्ये आलो आहे. तब्येत बरी नसल्यामुळे मी आजच्या मोर्चामध्ये सहभागी झालो नाही.मोर्चामध्ये सहभागी झालो नाही याचा अर्थ माझा शक्तीपीठला विरोध मावळला असा होत नाही. असे स्पष्टीकरण संजय घाटगे यांनी दिले.

आमदार असताना बाळासाहेब ठाकरे यांनी मला मंत्री पदाची ऑफर दिली होती. मात्र मी मंत्री पदाचा त्याग करून मी मतदारसंघातील विविध विकास कामांसाठी भरीव निधीची मागणी केली. कागल मतदार संघातील अनेक विकास कामे माझ्या मंत्रिपदाच्या त्यागातून झाली आहे. आज काही लोक मी स्वार्थी असल्याचा आरोप करत आहेत. मात्र, माझा त्याग त्यांना माहिती नाही. कावळ्याच्या शापाने गाय मरत नाही.

शिवसेनेमधून निवडणूक लढवत होतो. तेव्हा हेच नेते कोणाकडे जाऊन रांगेने पाकीट घेत होते हे मी पुराव्यानिशी सांगू शकतो, असा धक्कादायक आरोप शिवसेना ठाकरे गटाचे उपनेते संजय पवार यांनी संजय घाटगे यांना उत्तर देताना केला आहे.