Gokul Election : गोकुळच्या बैठकीत चंद्रकांत पाटलांनी मुश्रीफांना सुनावलं; म्हणाले, "कोरे आणि तुम्हीच ठरवा..."

Kolhapur News, 28 Sep : 'गोकुळ'च्या निवडणुकीसाठी महायुतीचे सर्व काही निर्णय आणि कोणाचे किती ठराव तुम्ही आणि 'जनसुराज्य'चे आमदार डॉ. विनय कोरे हेच ठरवणार असाल, तर तसे मुख्यमंत्री देवेंद्र फडणवीस यांना सांगा' मग हा खेळखंडोबा कशाला करताय', अशा शब्दात भाजप नेते आणि मंत्री चंद्रकांत पाटील यांनी आज राष्ट्रवादीचे नेते व मंत्री हसन मुश्रीफ यांना सुनावल्याचे समजते.

शिवाय आमदार अमल महाडिक यांना बाकीचे नेते राजकारण करणार असतील तर अमल 25 जागांची तयारी करा. आम्हाला युती करायची नाही असा सज्जड इशारा भाजप कार्यालयातील बंद दाराआड झालेल्या बैठकीत मंत्री पाटील यांनी दिला.

ठरावदारांच्या ओळख परेडवरून रविवारी राष्ट्रवादी व भाजप कार्यकर्त्यांत भाजपच्या कार्यालयातच मंत्री पाटील यांच्यासमोर राडा झाला. त्यानंतर तातडीने मंत्री पाटील यांनी मंत्री मुश्रीफ यांना बोलावून घेतले. कार्यकर्त्यांतील वाद शांत झाल्यानंतर मंत्री पाटील, खासदार धनंजय महाडिक, आमदार अमल महाडिक, माजी आमदार संजय घाटगे, मंत्री हसन मुश्रीफ, जिल्हाध्यक्ष बाबासाहेब पाटील-आसुर्लेकर, के. पी. पाटील यांच्यात बंद दाराआड बैठक झाली.

झालेल्या प्रकारावरून मंत्री पाटील यांनी राष्ट्रवादीच्या कार्यकर्त्यांवर व भूमिकेवर तीव्र नाराजी व्यक्त केल्याचे समजते. "महायुती म्हणून सर्व घटक पक्षांनी एकत्र येऊन निवडणूक लढवण्याचे ठरले आहे. पण, तुम्ही आणि डॉ. कोरे दोघेच महायुतीचे निर्णय घेणार असाल, तर तसे मुख्यमंत्र्यांना सांगा.

हा खेळखंडोबा कशाला मांडलाय," अशा शब्दात पाटील यांनी या बैठकीत नाराजी व्यक्त केल्याचे समजते. मंत्री पाटील यांच्या या इशाऱ्याने बैठकीत खळबळ उडाली. यातून पाटील यांनी मुश्रीफ व कोरे यांच्याविषयी नाराजी व्यक्त केली. त्यानंतर हे सर्व नेते महायुतीच्या बैठकीसाठी हॉटेलकडे निघून गेले. तिथे पुन्हा चर्चा करण्यात आली.