हसन मुश्रीफ-घाटगे वाद पेटला... राष्ट्रवादीचे मोर्चा काढून उत्तर

गडहिंग्लज : भाजपचे (BJP) जिल्हाध्यक्ष समरजित घाटगे यांनी आमदार हसन मुश्रीफ (Hasan Mushrif) यांची जाणीवपूर्वक बदनामी करीत जातीयवाद पसरविल्याच्या निषेधार्थ राष्ट्रवादी काँग्रेसने (NCP) आज (ता.१० ऑगस्ट) निषेध मोर्चा काढला. दसरा चौकातून लक्ष्मी मंदिरापर्यंत पावसात हा मोर्चा निघाला. तत्पूर्वी, दसरा चौकात निदर्शने करण्यात आली होती. (Hasan Mushrif, Samarjeet Ghatge Latest News)

सायंकाळी पाचच्या सुमारास राष्ट्रवादी काँग्रेसचे कार्यकर्ते दसरा चौकात जमले. समरजित घाटगे यांच्या निषेधार्थ जोरदार घोषणाबाजी करण्यात आली. ‘हसन मुश्रीफ आगे बढो...’ आदी घोषणांनी परिसर दणाणला. घाटगेंच्या निषेधाचे फलकही उभारले होते. दसरा चौकातून निषेध मोर्चाला सुरवात झाली. मुख्य मार्ग, लक्ष्मी रोडवरून मोर्चा लक्ष्मी मंदिराजवळ आला. या ठिकाणी मोर्चाची सांगता झाली.

राष्ट्रवादीचे शहराध्यक्ष सिद्धार्थ बन्ने, उदय जोशी, किरण कदम, रामगोंड ऊर्फ गुंडू पाटील, महेश सलवादे, हरुण सय्यद, तुषार पाटील, सदानंद पाटील, पृथ्वीराज पाटील, राहुल शिरकोळे, नेताजी पाटील, बंटी पाटील, संग्राम पाटील, प्रकाश माने, शारदा आजरी, रेश्मा कांबळे, शर्मिला पोतदार, ऊर्मिला जोशी यांच्यासह कार्यकर्ते सहभागी झाले होते.