Vanchit Bahujan Aaghadi : सांगलीत वंचितकडून खळखट्याक; रुग्णांकडून पैसे घेतल्याचा आरोप करत फोडले रुग्णालय

Sangli News : सांगलीत वंचित बहुजन आघाडीकडून शहरातल्या विश्रामबाग चौक येथील हॉस्पिटलची तोडफोड करण्यात आली आहे. राज्य कामगार विमा योजना व बांधकाम कामगार योजनेअंतर्गत मोफत उपचार असताना देखील रुग्णांकडून पैसे घेतल्याचा आरोप वंचितने केलाय. मात्र ते आरोप फेटाळण्यात आले असून तोडफोड करणाऱ्या वंचितच्या कार्यकर्त्यांना पोलिसांनी ताब्यात घेतले आहे.

शहरातील विश्रामबाग चौक येथे आदित्य हॉस्पिटल आहे. येथे एका राज्य कामगार विमा योजना व बांधकाम कामगार योजनेतंर्गत रूग्ण असतानाही एमआरआय करण्यासाठी 2500 रूपयांचे बील करण्यात आले. विशेष म्हणजे या रूग्णालयात ही योजना नसतानाही त्या रूग्णाला तेथे नेण्यात आले. तर बीलाची पावती त्या रूग्णालयाची नाही असे स्पष्टीकरण आदित्य हॉस्पिटलचे आहे.

पण वंचितच्या कार्यकर्त्यांनी हॉस्पिटलमध्ये घुसून जोरदार तोडफोड केली आहे. तसेच आदित्य मल्टीस्पेशालिटी हॉस्पिटलमध्ये शासकीय योजने अंतर्गत उपचार केले जातात. मात्र या ठिकाणी रुग्णांकडून पैसे घेण्यात येत असल्याचा आरोप वंचित बहुजन आघाडीकडून करण्यात आला.

तसेच वंचितच्या कार्यकर्त्यांनी रुग्णालयात घुसून जोरदार घोषणाबाजी केली. रुग्णालयातील असणाऱ्या काचा आणि साहित्यांची नासधूस केली. यानंतर आता वंचितच्या कार्यकर्त्यांनी केलेल्या आरोपांचे खंडन रुग्णालय प्रशासनाकडून करण्यात आले आहेत. तर लाभार्थ्यांकडून कोणत्याही प्रकारचे जादाचे पैसे घेतले जात नसल्याचे स्पष्टीकरण देखील देण्यात आले आहे.

दरम्यान आता रुग्णालय प्रशासनाकडून या प्रकरणात पोलिसांकडे तक्रार करण्यात आली आहे. सध्या या प्रकरणात पोलिस तपास करत असून गुन्हा दाखल करण्याची प्रक्रिया सुरू आहे.