Shahaji Patil : मला वाटतंय मिटकरींनी संजय राऊतांना गुरू मानलंय... शहाजी बापूंचा टोला

दहिवडी : अमोल मिटकरी हे पात्र राजकारणात नवं आहे. मला तर वाटतं मिटकरीनं संजय राऊत यांना गुरु मानलंय आणि त्यामुळे जे राऊतांचं झालं तेच एकदिवशी मिटकरीचं होणार, असा टोला आमदार शहाजी बापू पाटील यांनी मिटकरींना लगावला आहे.

विरकवाडी (ता. माण) येथे बैलगाडी शर्यतीच्या बक्षिस वितरणानंतर त्यांनी पत्रकारांशी संवाद साधला. भाजपने शिवसेना फोडून बेगडी राजकारण केलं, असं म्हणण्याचा जयंत पाटील यांना कोणताही नैतिक अधिकार नसून राष्ट्रवादीनेच शिवसेना अडचणीत आणली, असा घाणाघाती आरोप शहाजी बापू पाटील यांनी केला.

श्री. पाटील म्हणाले, आमची व भाजपची युती नैसर्गिक होती. ही युती अडीच वर्षापूर्वीच मार्गी लागायला पाहिजे होती. परंतू दुर्देवाने त्यावेळी ती मार्गी लागली नाही. याला जबाबदार राष्ट्रवादी काँग्रेस आहे. भाजपनं शिवसेना फोडली म्हणण्यापेक्षा राष्ट्रवादी काँग्रेसनं अख्खी शिवसेना डब्यात घालायचं ठरवलं होतं. ते एकनाथ शिंदे यांनी वाचवलं, त्याचा जळफळाट जयंत पाटील यांना होतोय.

आमदार शहाजी पाटील म्हणाले, अमोल मिटकरी हे पात्र राजकारणात अतिशय नवं आहे. मला तर वाटतं मिटकरीनं संजय राऊत यांना गुरु मानलंय आणि त्यामुळे जे राऊतांचं झालं तेच एकदिवशी मिटकरीचं होणार असा टोलाही त्यांनी मिटकरी यांना लगावला.

दुसरं काश्मीर माणचं खोरं...

"काय होता तो आमचा दुष्काळी भाग, काय झालाय तो आता आमचा दुष्काळी भाग, काय होणार तो आमचा दुष्काळी भाग. हिरवंच हिरवं दुसरं काश्मीर माण खोरं."

-आमदार शहाजी पाटील