राज्यात कोल्हापूर महानगरपालिका अशी एकमेव महापालिका आहे की ज्यामध्ये महापौर पदाची सोयीस्कर रित्या खांडोळी करण्यात आली. कोणताही कार्यकर्ता किंवा नगरसेवक नाराज होऊ नये यासाठी राजकीय बेरीज डोळ्यासमोर ठेवून पूर्णवेळ महापौर न करता सहा-सहा महिने पद दिले गेले आहे. यंदा देखील तीच परिस्थिती महापालिकेत असणार आहे. पण नव्याने तयार झालेल्या आणि पहिलीच निवडणूक पार पडलेल्या कोल्हापूर जिल्ह्यातील इचलकरंजी महापालिकेत देखील या महापौर पदाची खांडोळी होणार आहे.
पहिल्यांदाच झालेल्या निवडणुकीत या महापालिकेत पाच वर्षात तब्बल सहा महापौर होणार आहेत. इचलकरंजी महापालिकेचा महापौर व उपमहापौर यांचा कालावधी दहा महिन्यांचा असणार आहे. भाजपच्या नवनिर्वाचित नगरसेवक- नगरसेविकांच्या बैठकीत हा निर्णय घेण्यात आला.
या निर्णयामुळे पाच वर्षांत वस्त्रनगरीचे तब्बल सहा महापौर व तितकेच उपमहापौर होणार आहेत. याशिवाय स्थायी समिती, महिला व बालकल्याण समितीसाठी एक वर्षाचा कालावधी असणार आहे. त्यामुळे पाच वर्षांत एकूण 22 जणांची पदावर वर्णी लागणार आहे. या शिवाय पुढील काळात परिवहन व शिक्षण समिती कार्यान्वित करता येणार आहे. या दोन विषय समित्यांवर आणखी काहीजणांना काम करण्याची संधी मिळणार आहे. यामुळे बहुतांशी नगरसेवक नगरसेविकांना विविध पदे मिळणार आहेत; पण महापौर आणि स्थायी समिती या प्रतिष्ठेच्या पदावर वर्णी लागण्यासाठी मात्र चुरस कायम राहण्याची शक्यता आहे.
पहिल्या अडीच वर्षांसाठी इचलकरंजीच्या महापौरपदासाठी ओबीसी आरक्षण पडले आहे. त्यामुळे ओबीसी आरक्षणमधील एकूण २७ चेहरे भाजपकडे आहेत. यामध्ये कोणाला सर्वप्रथम संधी द्यायची, याबाबत आता नेतेमंडळींचा कस लागणार आहे. अनेकजण इच्छुक आहेत. त्यामुळे यावेळी पहिला मान नगरसेविकेला देण्याचा विचार नेत्यांचा सुरू असल्याची माहिती समोर येत आहे. त्यादृष्टीने आज दोन तीन नगरसेविकांशी संवाद साधल्याची माहिती समोर येत आहे.
पहिल्या अडीच वर्षात तिघांना तर उर्वरित अडीच वर्षात तिघांना अशा सहाजणांना महापौर पदावर काम करण्याची संधी मिळणार आहे. यामध्येही पहिला महापौर होण्यासाठी चुरस पाहावयास मिळणार आहे. सोबत याच कालावधीसाठी उपमहापौरपदाची निवड केली जाणार आहे. महापौर पदासाठी दहा महिन्यांचा कालावधी हा तुलनेने खूपच कमी असणार आहे. त्यामुळे या प्रतिष्ठित असलेल्या पदाचे एकप्रकारे अवमूल्यन केल्यासारखेच आहे.
यातून नेत्यांनी आपल्या कार्यकर्त्यांची सोय बघितली असली तरी कमी कालावधी मिळणार असल्याने या पदाला पुरेसा न्याय मिळणार नाही. या निर्णयामुळे पाच वर्षांत तब्बल सहा महापौर व तितकेच उपमहापौर होणार आहेत. महापौर झाल्यानंतर शहरासाठी काहीतरी नावीन्यपूर्ण काम करण्याची धडपड असणार आहे. त्यासाठी शाश्वत कामावर भर देण्याचा प्रयत्न राहू शकतो. पण अशी विकासकामे करण्यावर व त्याचे श्रेय घेण्यावर मर्यादा पडू शकतात.
इचलकरंजी महानगरपालिका महापौर व उपमहापौर पदाच्या निवडीची तारीख ठरली आहे. 9 फेब्रुवारी 2026 रोजी सकाळी 11 वाजता महापौर उपमहापौर निवडी पार पडणार असून या निवडीचे पीठासीन अधिकारी म्हणून कोल्हापूरचे अप्पर जिल्हाधिकारी संजय शिंदे यांची नियुक्ती करण्यात आली आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.