BJP President News : भाजपच्या राष्ट्रीय अध्यक्षांच्या निवडीची तारीख ठरली; खुद्द मोदी, शाह असणार प्रस्तावक... 'हा' नेता आघाडीवर...

BJP organisational news : भाजपच्या राष्ट्रीय अध्यक्षांच्या निवडीबाबत मोठी अपडेट समोर आली आहे. काही दिवसांपूर्वीच बिहारमधील आमदार नितीन नबीन यांच्या खांद्यावर कार्यकारी अध्यक्षपदाची जबाबदारी टाकण्यात आली आहे. त्यानंतर आता राष्ट्रीय अध्यक्षांच्या निवडीला वेग आला आहे. निवडणुकीच्या तारखाही निश्चित झाल्याची माहिती समोर आली आहे.

केंद्रीय आरोग्यमंत्री जे. पी. नड्डा हे सध्या भाजपचे राष्ट्रीय अध्यक्ष आहे. मात्र, त्यांची मुदत लोकसभा निवडणुकीआधीच संपली आहे. त्यांना मुदतवाढ देण्यात आली आहे. आता पक्षाने नव्या अध्यक्षांच्या निवडीसाठी १९-२० जानेवारी या तारखा निश्चित केल्याचे समजते. १९ जानेवारीला उमेदवारी अर्ज दाखल करणे आणि २० जानेवारीला मतदान होईल.

पक्षाचे कार्यकारी अध्यक्ष नितीन नबीन यांचीच दावेदारी सर्वाधिक मजबूत असल्याचे मानले जात आहे. या निवडणुकीसाठी खुद्द पंतप्रधान नरेंद्र मोदी, केंद्रीय गृहमंत्री अमित शाह, केंद्रीय संरक्षणमंत्री राजनाथ सिंह यांच्यासह पक्षसंघटनेतील दहा नेते प्रस्तावक असतील.

दरम्यान, नितीन नबीन हे राष्ट्रीय अध्यक्ष बनल्यास ते आतापर्यंतचे सर्वाधिक तरूण अध्यक्ष असतील. त्यांचा कार्यकाळ जानेवारी २०२९ पर्यंत असेल. याचवर्षी लोकसभेची निवडणूक आहे. त्यामुळे नबीन यांचा कार्यकाळ वाढविला जाऊ सकतो. नड्डा यांचाही कार्यकाळा यापूर्वी असाच वाढविण्यात आला होता.

नड्डा यांनी २०२० मध्ये अध्यक्षपदाची सुत्रे हाती घेतली होती. त्यानंतर २०२४ मध्ये लोकसभा निवडणुकीमुळे त्यांना मुदतवाढ देण्यात आली होती. त्यांना अध्यक्ष होण्यापूर्वी स्थायी अध्यक्ष बनविण्यात आले होते. त्यामुळेच नबीन यांचे सध्या पारडे जड असल्याचे सांगितले जात आहे.

नबीन हे ४५ वर्षांचे असून त्यांना पक्षसंघटनेचा मोठा अनुभव आहे. ते पाचवेळा आमदार बनले आहेत. बिहार सरकारमध्ये सध्या ते रस्ते निर्माण मंत्री आहेत. त्यांचे वडील नवीन किशोर सिन्हा हे भाजपचे मोठे नेते होते. त्यांच्याच पावलावर पाऊल टाकत नबीन यांनीही राजकारणात वाटचाल केली. बांकीपूर या विधानसभा मतदारसंघाचे ते प्रतिनिधित्व करतात.