Mahapalika News : मोठी बातमी : 'या' महापालिकेत नव्याने आरक्षण सोडतीचे आदेश; नगरसेवक इच्छुकांचा जीव पुन्हा टांगणीला

Municipal Election : इचलकरंजी महानगरपालिकेची यंदा पहिलीच निवडणूक आहे आणि या पहिल्याच निवडणुकीत आरक्षण जाहीर झाल्यानंतर इच्छुकांची तोबा गर्दी पाहायला मिळत आहे. आरक्षण जाहीर झाल्यानंतर अनेकांनी फटाके फोडून उमेदवारीची सलामी देत आनंद जाहीर केला. मात्र या आनंदावर केवळ चार दिवसातच विरजन पडले.

कारण इचलकरंजी महानगरपालिकेचे प्रभाग आरक्षण सोडत पुन्हा नव्याने होणार आहे. त्यामुळे इचलकरंजी महानगरपालिका राजकारणात खळबळ उडाली आहे. नागरीकांच्या मागास प्रवर्गातील महिला आरक्षण सोडतीमध्ये तांत्रिक चुक झाल्याचे समोर आले आहे. त्यामुळे नागरीकांचा मागास प्रवर्ग यातील महिला व सर्वसाधारण महिलांसाठीचे पुन्हा आरक्षण काढण्यात येणार आहे.

त्यामुळे इचलकरंजी येथील महापालिका निवडणुकीसाठी प्रभाग आरक्षणाची सोमवारी (ता. १७) सकाळी ११ वाजता नव्याने सोडत हेणार आहे. तसे आदेश आज निवडणूक विभागाकडून इचलकरंजी महापालिकेस देण्यात आले आहेत. नव्याने आरक्षण काढण्यात येणार असल्याने ओबीसी आणि खुला या प्रवर्गातील इच्छुकांचा जीव टांगणीला लागला आहे.

महानगरपालिकेच्या ६५ जागांसाठी ११ नोव्हेंबरला आरक्षण सोडत काढण्यात आली होती. मात्र त्यानंतर महापालिका प्रशासनाकडून मान्यतेसाठी निवडणूक आयोगाकडे आरक्षण सोडतीचा निकाल पाठविण्यात आला होता. त्याची तपासणी करताना वरील तांत्रिक चुक समोर आली. त्यामुळे आता पुन्हा एकदा नागरिकांचा मागास प्रवर्ग महिला आणि सर्वसाधारण महिला यांचे आरक्षण सोडत श्रीमंत घोरपडे नाट्यगृहात काढण्यात येणार आहे.

या आरक्षणावर १९ ते २५ नोव्हेंबर दरम्यान हरकती व सूचना घेण्यात येणार आहेत. यापूर्वी सोडत झालेल्या आरक्षणानंतर राजकीय पक्ष आणि आरक्षीत जागेवरील इच्छुक कामाला लागले होते. मात्र पुन्हा आरक्षणाची प्रक्रिया राबविण्या येणार असल्याने इचलकरंजीच्या शहरातील राजकारणात खळबळ उडाली आहे.