Solapur ZP : बदली झाली अन्‌ कपाटाची चावीही सोबत नेली; नव्या अधिकाऱ्याला कामच करता येईना!

Solapur, 13 July (विठ्ठल सुतार) : सोलापूर जिल्हा परिषदेच्या बांधकाम विभाग क्रमांक एकचे कार्यकारी अभियंता नरेंद्र खराडे यांची नांदेड येथे नुकतीच बदली झाली आहे. त्यांच्या जागी अ. परवेझ खैरदी रुजू झाले आहेत. बदलीनंतर कार्यालयाचा पदभार देताना खराडे यांनी कपाटाची चावी खैरदी यांच्याकडे देणे अपेक्षित हेाते. मात्र, खराडे यांनी कपाटाची चावी स्वतःसोबतच नेल्यामुळे नवे अधिकारी खैरदी यांना महत्त्वाच्या फायलींवरील निर्णय घेणे अवघड झाले आहे.

खराडे यांनी पदभार देऊन १५ दिवस झाले, तरी कपाटाची चावी खैरदी यांच्याकडे देण्यात आलेली नाही. त्यामुळे कपाटाचे कुलूप तोडण्याच्या सूचना अतिरिक्त मुख्य कार्यकारी अधिकारी संदीप कोहिनकर यांनी दिल्या आहेत.

दरम्यान, याबाबत कार्यकारी अभियंता नरेंद्र खराडे यांच्या मोबाईल क्रमांकावर संपर्क साधण्याचा प्रयत्न केला असता, त्यांच्याशी संपर्क होऊ शकला नाही.

कार्यकारी अभियंता नरेंद्र खराडे यांच्या कार्यकाळात अनेक वाद निर्माण झाले होते. बांधकाम विभाग क्रमांक २ च्या कार्यकारी अभियंत्यांचे अधिकार वापरणे, परस्पर निविदा काढणे यासह अनेक बाबींवर त्यांच्याविरोधात तक्रारी करण्यात आल्या होत्या. याशिवाय जिल्हा परिषद व परिसरातील सुरक्षा रक्षकांच्या ठेकेदाराला नियमबाह्य पद्धतीने ३१ महिन्यांची मुदतवाढ देण्याच्या विषयासह अनेक प्रकरणे वादग्रस्त ठरली होती.

अनेक ठेकेदारांच्या बिलांवर वेळेत स्वाक्षऱ्या न करणे, तसेच जाणूनबुजून फायली अडवून ठेवणे, असेही आरोप खराडे यांच्यावर झाले होते. काही महिन्यांपूर्वी वरिष्ठ अधिकाऱ्यांनी खराडे यांच्या कार्यालयाची तपासणीही केली होती. मात्र, त्याबाबत कोणतीही प्रशासकीय कारवाई करण्यात आली नव्हती.

नांदेड येथे बदली झालेल्या कार्यकारी अभियंता नरेंद्र खराडे यांनी कपाटाला कुलूप लावून त्याची चावी सोबत नेल्याचे कर्मचाऱ्यांकडून समजले. कुलूपबंद असलेल्या कपाटात कामकाजाशी संबंधित महत्त्वाची कागदपत्रे व फायली आहेत. त्यांनी स्वतःहून चावी न दिल्यास कुलूप तोडण्याच्या सूचना करण्यात आल्याची माहिती अतिरिक्त मुख्य कार्यकारी अधिकारी संदीप कोहिनकर यांनी दिली आहे.