Kolhapur Ichalkaranji Mayor: कोल्हापूर, इचलकरंजीत महापौरपदाची लॉटरी कोणाला? दोन्ही महापालिकांसाठी OBC आरक्षण,रेसमध्ये कोण कोण?

कोल्हापूर आणि इचलकरंजी महापालिकेच्या निवडणुकीत महायुतीने घवघवीत यश मिळवल्यानंतर महापौरपदाच्या आरक्षणाकडे लक्ष लागले होते. सर्वच विजयी उमेदवारांना उत्कंठा लागून राहिली होती. अखेर आज दोन्ही महापालिकांसाठी आरक्षण सोडत पार पडली असून दोन्हीसाठी OBC आरक्षण पडले आहे. त्यामुळे दोन्ही महापालिकांमधील इच्छुक नगरसेवकांनी फिल्डिंग लावायला सुरुवात केली आहे.

कोल्हापूर आणि इचलकरंजी या दोन्ही महापालिकांमध्ये भाजप, शिवसेना आणि राष्ट्रवादी काँग्रेसची युती झाली होती. निवडणुकीत दोन्ही ठिकाणी युतीला पूर्ण बहुमत मिळाले आहे. महापौरपदावरून भाजप आणि शिवसेनेत वाद असल्याने महापौर कोणत्या पक्षाचा होणार हे येत्या काही दिवसांत स्पष्ट होईल. पण त्यापूर्वी महायुतीतील OBC प्रवर्गातील विजयी नगरसेवकांनी महापौरपदावर आपलाच दावा कसा भक्कम राहील याची तयारी सुरु केली आहे. यातील इच्छुकांची नावेही समोर आली आहेत.

कोल्हापूर महानगरपालिकेसाठी सर्वसाधारण गटातून निवडून आलेले मुरलीधर जाधव, रूपाराणी निकम तर ओबीसी प्रवर्गातून निवडून आलेले विजयसिंह उर्फ रिंकू देसाई, प्रमोद देसाई, विशाल शिराळे आणि वैभव कुंभार यांच्यात स्पर्धा असणार आहे. जर शिवसेनेकडे महापौर पद गेल्यास तर अजय इंगवले, अश्किन आजरेकर, ही नावे आहेत. मात्र भाजपचा महापौरपदावर दावा असल्याने ही संधी सोडण्याच्या तयारीत नाही.

इचलकरंजी महापालिकेसाठी मोठी स्पर्धा आहे. भाजप शिवसेना आणि राष्ट्रवादीने एकत्र येत ही निवडणूक लढवली असली तरी इचलकरंजीच्या पहिल्याच निवडणुकीत महायुतीमध्ये भाजपने बहुमत मिळवले आहे. त्यामुळे यावर भाजपचाच दावा असणार आहे. विठ्ठल चोपडे, तानाजी पोवार, राजू बोन्द्रे, सुशांत कलगते, राजू पुजारी, उदय धातुंडे, योगेश पाटील यांच्यात महापौर पदासाठी चुरस असणार आहे.