Kolhapur Political News : काँग्रेसला मोठं भगदाड, 35 जणांची यादी तयार, मुंबईत होणार पक्षप्रवेश

Kolhapur Local Elections : आगामी स्थानिक स्वराज्य संस्थेच्या निवडणुकीच्या पार्श्वभूमीवर कोल्हापूर महानगरपालिकेत महायुतीकडून कडून जोरदार राजकीय हालचाली सुरू झाल्या आहेत. बेरजेचे राजकारण जुळवण्यासाठी एकनाथ शिंदेंच्या शिवसेनेकडून काँग्रेसचे पदाधिकारी गळाला लावण्यासाठी हालचाल सुरू आहे.

काँग्रेस गटनेते शारंगधर देशमुख यांनी नुकतीच उपमुख्यमंत्री एकनाथ शिंदे यांची भेट घेत संकेत दिले आहेत. रविवार पर्यंत शारंगधर देशमुख यांच्यासह काँग्रेसमधील मोठा गट उपमुख्यमंत्री एकनाथ शिंदे यांच्या उपस्थितीत मुंबईत पक्षप्रवेश करणार आहे. त्यानंतर टप्प्याटप्प्याने अनेकांचे पक्षप्रवेश होणार असल्याची देखील माहिती आहे.

आगामी महापालिका निवडणुकीच्या पार्श्‍वभूमीवर शहरातील माजी नगरसेवकांचा एक गट येत्या रविवारपर्यंत शिवसेनेत प्रवेश करणार आहे. एकूण 35 जणांची यादी असून त्यापैकी टप्प्‍याटप्प्याने प्रवेश होणार आहेत. उपमुख्यमंत्री एकनाथ शिंदे यांच्या उपस्थितीत हा प्रवेशाचा कार्यक्रम होणार असून देशमुख यांच्यासह जवळपास 12 माजी नगरसेवकांसह प्रमुख पदाधिकारी पक्षप्रवेश करणार आहेत.

कोल्हापूर शहर हे शिवसेनेचा बालेकिल्ला आहे. त्यामुळे आगामी स्थानिक स्वराज्य संस्थेच्या निवडणुकीत कोल्हापूर महानगरपालिकेवर भगवा फडकवण्यासाठी शिंदे यांची शिवसेना कामाला लागली आहे. उपमुख्यमंत्री एकनाथ शिंदे यांनी कोल्हापूर महानगरपालिका निवडणुकीची जबाबदारी पालकमंत्री प्रकाश आबिटकर यांच्यावर सोपवली आहे. तर माजी खासदार संजय मंडलिक आणि आमदार राजेश क्षीरसागर यांच्याकडून काँग्रेसच्या पदाधिकाऱ्यांना एक-एक करत गळाला लावण्याचे काम सुरू आहे.

अनेक धक्कादायक नावे पक्षप्रवेशानंतरच समोर येणार

सध्यातरी काँग्रेसचे गटनेते शारंगधर देशमुख यांचा पक्षप्रवेश निश्चित झाला असला तरी राज्य नियोजन मंडळाचे अध्यक्ष राजेश क्षीरसागर यांनी 35 जण असल्याचा दावा केला आहे. यामध्ये दोन माजी महापौर, उपमहापौर, यांच्यासह महानगरपालिकेत नगरसेवक पद भूषवले अशा पदाधिकाऱ्यांचा समावेश आहे. रविवार पर्यंत पहिल्या टप्प्यातील अनेकांचे पक्षप्रवेश होणार आहेत. टप्प्याटप्प्याने अनेक दुसऱ्या फळीतील पदाधिकाऱ्यांचे पक्षप्रवेश होणार आहेत.