Kolhapur politics : शड्डू ठोकला, एकमेकांना बघून घेण्याची भाषा; कोल्हापूर महापालिकेत महायुतीचे नगरसेवक एकमेकांना भिडले

Kolhapur municipal news : कोल्हापूर महानगरपालिकेच्या वृक्ष प्राधिकरण बैठकीत पुन्हा एकदा महायुतीमध्ये वादाची ठिणगी पडली आहे. सत्तेत एकत्र असूनही शिवसेनेचे नेते आणि राष्ट्रवादी काँग्रेसच्या नेत्यांमध्ये शाब्दिक वाद उफाळून आला आहे. एकमेकाला बघून घेण्याची भाषा आणि खाली चौकात चल तुला दाखवतो अशा धमक्या अन् थेट बैठकीत शड्डू ठोकत दोन प्रमुख नेते भिडले आहेत. बैठकीत अचानक हा वाद सुरू झाल्याने काही काळ तणाव बनला होता.

कोल्हापूर महानगरपालिकेमध्ये मंगळवारी वृक्ष प्राधिकरण संदर्भात बैठक आयोजित करण्यात आली होती. या बैठकीच्या शेवटच्या सत्रात राष्ट्रवादी काँग्रेसचे प्रमुख आदिल फरास हे वृक्षतोड संदर्भात काही प्रस्ताव ठेवला होता. त्या प्रस्तावाला शिवसेनेचे गटनेते शारंगधर देशमुख यांनी विरोध दर्शवल्याचे सांगण्यात येते.

फरास यांनी ठेवलेल्या प्रत्येक गोष्टीला विरोध होत असल्याचे सांगत यावरून शाब्दिक वाद आणखीन वाढला. यापूर्वीही महानगरपालिकेच्या सभागृहात दोघांचा वाद विकोपाला गेला होता. परिवहन सभापती निवडीनंतर हा वाद आणखीन चिघळला होता. त्यात पुन्हा एकदा वृक्ष प्राधिकरण बैठकीत हा वाद झाला.

बैठकीतच एकमेकाला बघून घेण्याच्या भाषेसह थेट एकमेकांकडे पाहून शड्डू मारण्यात आला. शिवाय महापालिकेतून खाली चल तुला बघून घेतो, अशा पद्धतीची शब्द एकमेकांकडून आल्याचे सांगण्यात येते. दरम्यान या गोष्टीची माहिती कार्यकर्त्यांना समजल्यानंतर दोन्ही बाजूचे समर्थकांनी आणि महापालिकेच्या चौकात मोठी गर्दी केली.

महापालिकेसमोरील वातावरण काही काळ तणावपूर्ण बनले होते. पोलिसांनी घटनास्थळी धाव घेत जमावाला पांगवले. दरम्यान या वादावर समेट घडवण्यासाठी इतर नगरसेवकांचे प्रयत्न सुरू आहेत. महायुतीतील नगरसेवकच हमरीतुमरीवर आल्याने कोल्हापूर शहरात याची जोरदार चर्चा सुरू आहे.