Phaltan : वय कमी करून भरतीचे अमिष; फलटण, माणमधील दोघांवर गुन्हा

फलटण शहर : वय कमी करून पोलिस किंवा आर्मीमध्ये भरती करतो, अशी बतावणी करत तीन लाख रुपये घेऊन एका तरुणाची फसवणूक केल्याप्रकरणी वडले (ता. फलटण) येथील कोडवलकर ॲकॅडमीच्या दोघांवर गुन्हा दाखल करण्यात आला आहे.

रवींद्र नामदेव कोडवलकर (रा. दालवडी, ता. फलटण), व अवचित दादासो ताटे (रा.वारुगड, ता. माण) अशी गुन्हा नोंद झालेल्या संशयितांची नावे आहेत. याबाबत फलटण ग्रामीण पोलिस ठाण्यातून मिळालेली माहिती अशी की, कोडवलकर करिअर ॲकॅडमी येथे १० मे २०२२ रोजी प्रवेश घेताना सुनील त्र्यंबक पवार (वय २५, रा. फडतरवाडी विखळे (ता. कोरेगाव) यास प्रवेशाप्रसंगी वय जास्त असल्याने त्यास तुला ॲकॅडमीत प्रवेश घ्यायचा असेल तर, तुझे वय कमी करावे लागेल, असे सांगितले.

वय कमी करून लावण्यासाठी आम्हाला तीन लाख रुपये द्यावे लागतील. तुझे वय कमी करून पोलिस भरती किंवा आर्मीमध्ये भरती करू, असे आमिष दाखवून ॲकॅडमीचे रवींद्र नामदेव कोडवलकर (रा. दालवडी, ता. फलटण) व अवचित दादासो ताटे (रा. वारुगड, ता. माण) यांनी सुनील त्र्यंबक पवार कडून ता. १२ मे रोजी ४० हजार रुपये ऑनलाईन व १७ मे रोजी शिंगणापूर रोड, फलटण येथे २ लाख ६० हजार रुपये रोख घेतले.

नंतर वारंवार सुनील पवार याने पैसे परत मागूनही त्यांनी न दिल्याने फसवणूक केल्याचे पवारच्या लक्षात आले. याबाबत फसवणूक केल्याची फिर्याद सुनील त्र्यंबक पवार यांनी केली आहे. गुन्ह्याचा अधिक तपास पोलिस उपनिरीक्षक सागर अरगडे हे करीत आहेत.