Maharashtra-Karnataka Border Dispute : अक्कलकोटहून कर्नाटकात जाणारी एसटी वाहतूक बंद

सोलापूर : महाराष्ट्र (Maharashtra) आणि कर्नाटकातील (Karnataka) सीमाप्रश्न (border dispute) चांगलाच पेटला आहे. कर्नाटकाचे मुख्यमंत्री बसवराज बोम्मई (Basavraj Bommai) यांनी सांगली जत तालुक्यातील काही गावांवर, तसेच सोलापूर जिल्ह्यातील अक्कलकोट आमचे आहे, असे म्हटले हेाते. त्याला महाराष्ट्रातून जोरदार प्रत्युत्तर देण्यात आले होते. मात्र, त्याचे पडसाद अजूनही उमटत आहेत. त्यामुळे अक्कलकोटहून कर्नाटकला जाणारी आणि कर्नाटकातून अक्कलकोटला येणारी एसटी वाहतूक बंद ठेवण्यात आली आहे. (Maharashtra-Karnataka border dispute : ST Bus service from Akkalkot to Karnataka stopped)

कर्नाटकच्या मुख्यमंत्र्यांनी अक्कलकोट, सोलापूर आमचेच असल्याचा दावा केल्याने कर्नाटक-महाराष्ट्र सीमावादाचा प्रश्न पुन्हा चिघळला आहे, त्यामुळे अक्कलकोटवरून कर्नाटकात जाणारी व कर्नाटकातून अक्कलकोटवरून येणारी एसटी वाहतूक बंद आहे.

कर्नाटकातील बेळगाव, कारवार, निपाणी असा भाग आमचाच असल्याचा दावा करीत, तेथील लोक महाराष्ट्रात यायला तयार असताना कर्नाटक सरकार त्याला विरोध करीत आहे. तरीसुद्धा कर्नाटकच्या मुख्यमंत्र्यांनी अक्कलकोट व सोलापूर आमचे असल्याचा दावा करून खळबळ उडवून दिली. लोकप्रतिनिधींसह सरकारने त्यांचे कान टोचले आहे. आता तो विषय शांत होऊ लागला आहे. पण, अजूनही एसटी वाहतूक सुरळीत झालेली नाही.

सोलापूर आगारातून अक्कलकोटमार्गे कर्नाटकात जाणाऱ्या ६० बस गाड्यांची वाहतूक बंद करण्यात आली आहे. मागील तीन दिवसांपासून ही वाहतूक बंद आहे. कर्नाटकात जाणाऱ्यांसाठी विजयपूरहून एसटी सेवा सुरू असल्याचे आगार व्यवस्थापकांनी सांगितले.