Shaktipith Mahamarg : CM फडणवीसांच्या ड्रीम प्रोजेक्टला महायुतीतूनच विरोध : तिन्ही पक्षांची सत्ता असलेल्या जिल्हा परिषदेत विरोधी ठराव समंत

Shaktipith Mahamarg district council decision: राज्य सरकार आणि मुख्यमंत्री देवेंद्र फडणवीस यांचा महत्त्वकांक्षी प्रोजेक्ट असलेल्या शक्तिपीठ महामार्गाला कोल्हापूर जिल्ह्यासह इतर जिल्ह्यातून देखील विरोध होत आहे. अशातच महायुतीची सत्ता असलेल्या कोल्हापूर जिल्हा परिषदेत देखील शक्तिपीठ विरोधी महामार्गाला विरोध करणारा ठराव काँग्रेसकडून मांडण्यात आला.

आश्चर्याची बाब म्हणजे महायुतीतील सर्व सदस्यांनी तसेच भाजपच्या काही सदस्यांनी या विरोधी ठरावाला पाठिंबा दिला. भाजपच्या सदस्यांनीही या ठरावाला विरोध न करता पाठिंबा दिल्याने हा निर्णय राजकीयदृष्ट्या महत्त्वाचा मानला जात आहे.

जवळपास पाच वर्षानंतर कोल्हापूर जिल्हा परिषदेमध्ये निवडणूक झाल्यानंतर पहिली सर्वसाधारण सभा पार पडली. पहिल्याच सर्वसाधारण सभेत काँग्रेस कडून शक्तिपीठ महामार्गाला विरोध करणारा ठराव मांडण्यात आला.

काँग्रेसचे गटनेते एकनाथ पाटील यांनी शक्तिपीठ महामार्गामुळे शेतकर्‍यांच्या सुपीक जमिनीचे मोठे नुकसान होणार असल्याचे सांगत हा प्रकल्प रद्द करण्याची मागणी करणारा ठराव मांडला. या ठरावाला सभागृहातील विविध पक्षांच्या सदस्यांनी समर्थन दिले आणि अखेर तो मंजूर करण्यात आला.

ठरावावर चर्चा सुरू असताना जिल्हा परिषदेचे उपाध्यक्ष तानाजी पोवार यांनी वेगळी भूमिका मांडली. शक्तिपीठ महामार्ग हा मुख्यमंत्री देवेंद्र फडणवीस यांचा ड्रीम प्रोजेक्ट असून भाजपच्या १२ जिल्हा परिषद सदस्यांचा या प्रकल्पाला पाठिंबा असेल, असे त्यांनी सभागृहात सांगितले. मात्र, त्यांच्या वक्तव्यानंतर भाजपच्या जिल्हा परिषद सदस्या सुयशा घाटगे यांनी तात्काळ भूमिका स्पष्ट करत, "आमचाही शक्तिपीठ महामार्गाला विरोध आहे. तुमचे मत वैयक्तिक असू शकते, पण आम्ही या प्रकल्पाला विरोधच करणार," असे स्पष्टपणे सांगितले.

त्यांच्या या भूमिकेमुळे सभागृहात काही काळ चर्चा रंगली. यानंतर तानाजी पोवार यांनीही आपली भूमिका मवाळ घेत, "१२ सदस्यांचे मत वेगळे असले तरी आम्ही शक्तिपीठविरोधी ठरावाला मंजुरी देत आहोत," असे सांगितले. त्यानंतर हा ठराव सर्वानुमते मंजूर करण्यात आला.

महायुतीची सत्ता असलेल्या कोल्हापूर जिल्हा परिषदेतच शक्तिपीठ महामार्गाविरोधात ठराव मंजूर झाल्याने राज्याच्या राजकारणात नव्या चर्चांना सुरुवात झाली आहे. विशेषतः भाजपच्या सदस्यांनीही विरोधाची भूमिका घेतल्याने स्थानिक पातळीवरील जनभावना आणि पक्षीय भूमिकेत फरक असल्याचे चित्र समोर आले आहे.